Í fréttum er þetta helst...

Færa ykkur

2005-05-24T08:41:00.000Z

Jæja ég ætla að flytja ykkur á nýju fréttasíðuna mína
ég mun ekki skrifa hér meir, góða skemmtun.......

Selma

Brúnaþung

2005-05-23T16:48:00.000Z

Mín varð frekar brúnaþung á endurkomu slysó í dag þegar læknirinn var búinn að pota í allan ökklann á Sigurgeiri við mikið æ og ó og sagði að það væri best að hann færi í göngugips til 10. júní. Það eiginlega kom snúður á mína og hér með hætti ég algjörlega að lofa einhverju eftir sjúkrahúsheimsóknir. Lækninum fannst þetta sem sagt ekki líta nógu vel út til að sleppa alveg við gips og lét setja göngugips á hann og það verður til 10. júní. Ég vara ykkur við trambólínum.........

Selma

Á slysó

2005-05-17T08:41:00.000Z

Það vildi nú ekki betur til á heimleiðinni í gær en við lentum á slysó, þannig að við vorum ekki komin heim fyrr en um miðnætti. Ekkert alvarlegt en við ákváðum að koma við í Borgarnesi á leiðinni heim í gær og þar var þetta forláta trambólín komið upp og auðvitað þurfti að prófa það. Ekki ég heldur Sigurgeir og það vildi ekki betur til en hann sneri á sér fótinn svo hann varð stokkbólginn á augabragði, ég ákvað að fara á slysó fyrst ég var að fara að gegnum Reykjavík og þar var hann myndaður en ekki brotinn. Læknirinn hins vegar fannst betra að setja hann í spelkugips í viku, þar sem þetta var við vaxtarbeinið eða eitthvað. Þannig að heim komum við með fótinn gipsaðan upp að hné og ætluðum að fara að fá hækju en þær kosta nú bara 1.900 kr. stk. af barnahækju svo ég bíð með það þar til í dag að skoða það.

Annars var helgin meiriháttar, við S-in fórum í Miðhús á föstudaginn og vorum þar í "vinnu" alla helgina og gerðum meira segja heilmikið gagn. Sigurgeir fór svo í afmæli til Halldórs vinar síns í gær og það var heilmikið fjör, ég fór að kenna á meðan svo ég hefði uppí ferðina...... og fór svo í kaffi til Jobbu og hitti margt gott fólk þar :-)

B-in héldu áfram uppteknum hætti og smíðuðu hér alla helgina. Á eftir að fara og taka það út.

SElma

Mira og ég

2005-05-10T08:28:00.000Z

Svo má ekki gleyma að senda mynd af okkur Miru, hún er sem sagt litla krúsidúllan á heimilinu, þ.e. í Þýskalandi, ekki hér ég hefði sennilega tekið eftir því :-). Hún er fædd 20. ágúst 2004 en átti að fæðast ca 20 sept. 2004. Aðeins að flýta sér.

Hildur fædd

2005-05-10T08:23:00.000Z

Auðvitað gat Hlökk ekki beðið með að kasta og Höddi hringdi á sunnudagsmorgunn til að láta mig vita og ég bara í Þýskalandi. En myndir komu strax svo ég gat séð það alla leið til Þýskalands. Frábær tækni þetta. Er þetta ekki bara fallegt folald sem hann Tryggvi á. Hann heppinn !!!

Fljótt að líða

2005-05-09T20:48:00.000Z

Þessi helgi var eitthvað svo fljót að líða enda byrjaði hún á því að sá sem kom að ná í mig á flugvöllin þ.e. maðurinn hennar Önju, hann á Porsch, spurði mig hvort hann mætti ekki keyra hratt heim, ég hélt það nú og hann spurði í 300 já já sagði ég bara og hélt hann væri að djóka, hann sagði þá já þú segir mér bara þegar þér finnst ég vera farinn að fara of hratt. Hann var kominn í 280 þegar ég spurði hann hvort hann gæti ekki farið aðeins hægar. jú jú ekkert mál og keyrði svo á ca 200-250 það sem eftir var, enda vorum við bara 1/2 tíma heim frá flugvellinum. Málið var að þegar hann var kominn niður í 200 fannst mér það ekkert hratt af því allir hinir voru á þeim hraða og maður fann ekki svo mikið fyrir hraðanum í þessum bíl en dísús 280 var orðið svolítið mikið fyrir minn smekk.

En það var meiriháttar gaman úti og mikið borðað, mikið talað og meira segja farið á hestbak og það hef ég bara ekki gert síðan í kvennareiðinni miklu sl. sumar.

Gott samt að komast heim og strákarnir ekkert smá duglegir um helgina. Þeir hafa bara unnið allir sem einn og heilu timurveggirnir risið hér um allt.

Selma

Þýskaland á morgun

2005-05-05T22:29:00.000Z

Enginn tími til að blogga þessa dagana og heldur ekki um helgina því ÉG er að fara til Þýskalands í fyrramálið. Strákarnir verða bara allir heima fyrir utan að Sigurgeir fer auðvitað í skólann.

Ég held það sé svona 25 stiga hiti úti, ekki alveg fyrir mig en hlakka rosalega til að hitta fólkið og sjá litlu krúsidúlluna sem fæddist í ágúst í fyrra.

Vona að Hlökk mín taki ekki uppá því að kasta þessa helgina, bíði þar til um næstu því þá er stefnan að komast í sauðburðinn í Miðhúsum, ekki má maður nú missa af neinu.

Og svo eru það garðverkin alla daga, það var mokað mold hingað og þangað í dag, ýmist út úr garðinum eða inn í hann og það sáu feðgarnir alveg um í dag, aðallega Beggi, Sigurgeir sá um ormana og Bjartmar þetta hefðbundna í öllu.

Selma

Allir úti í allan dag

2005-04-30T22:30:00.000Z

Já hér var nú bara gott veður í allan dag enda allir úti í garði. Ég fór reyndar á námskeið hjá Ökukennarafélaginu í morgunn en kom heim um hádegi og þá voru þeir feðgar að smiða veggi og þeir dunduðu við það í allan dag, þ.e. rífa veggi og smíða aðra í staðinn. Þeir voru misduglegir eftir aldri, ég held sá minnsti hafi komið minnstu í verk en varð samt mest úr verki held ég, hann stoppaði ekki allan daginn enda svo þreyttur þegar hann kom inn að hann bara grenjaði þar til hann sofnaði.

Ég hins vegar keyrði mörgum hjólbörum af mold í beðin allt í kring um húsið og sér ekki högg á mold, allavega á ég eftir að fara með margar hjólbörur í viðbót ef haugurinn á að hverfa nema ég geti selt manninum í næsta húsi afganginn. Nú ég var svo þreytt eftir þetta að ég næstum sofnaði fyrir framan Spaugstofuna og hana hef ég nú eiginlega ekki séð í allan vetur. Ég marði það samt.

Ef veðrið verður áfram svona gott á morgun þá held ég áfram með moldina, sjáum til hvenær hún verður búin......

Selma

Vinir í timburvinnslunni

2005-04-30T22:24:00.000Z

Þeir voru nokkuð góðir í timburvinnslunni þeir vinirnir Sigurgeir og Jóhann og pússuðu ansi margar fjalir.

Bjartmar líka með hamarinn

2005-04-30T22:22:00.000Z

Annar góður með hamarinn og var líka til í að rífa niður veggi en steinar urðu nú frekar fyrir barðinu á hamrinum en veggir.

Rífa niður

2005-04-30T22:19:00.000Z

Það eins gott að vera ekki fyrir maður yrði bara rifinn niður. Sigurgeir ljómandi góður með hamarinn og nokkrir svona frekar þreyttir veggir rifnir niður í dag.

Mold

2005-04-29T20:27:00.000Z

Sigurgeir ákvað að vera veikur í dag, með ljótann hósta svo hann var bara heima. Þá var hann settur í útivistarbann þar sem hann myndi nú ekki skána nema hann væri inni. Það tókst nú ekki þar sem það var örugglega 15 stiga hiti og ég varð auðvitað að reyna að koma moldinni, sem sturtað var niður hérna fyrir fram í gær, í öll beðin því þau eru moldarlaus og mér tókst að komast með nokkrar börur.

Hann fór líka út með pabba sínum að rífa niður eitt grindverk og það á sem sagt að fara í það á morgun að setja annað upp. Ég þarf hins vegar að fara á eitt námskeið hjá ökukennarafélaginu í fyrramálið og svo kenna eins og einn tíma. Svo kemst ég aftur í moldina. Annars voru nágrannar mínir eitthvað að öfundast út í þessa mold og höfðu áhuga á að vita hvar við hefðum fengið hana. Ég sagði eins og satt var það kom einhver maður með hana og sturtaði henni þarna fyrir framan. Og ég yrði sem sagt að reyna að klára þetta í kvöld svo henni yrði ekki mokað annað í skjóli nætur. Maðurinn sagði þá að hann hefði einmitt beðið í allan dag eftir því að ég færi í vinnuna. Ég sagði honum að hann yrði þá að bíða lengi því ég væri bara alls ekki í neinni vinnu, væri BARA heima.

Selma

Listaverið hans Sigurgeirs

2005-04-29T20:25:00.000Z

Erum alveg óendanlega stolt yfir þessari handavinnu sem drengurinn kemur með heim úr skólanum. Hann mætti með þessa flottu vefmynd í gær og ég náttúrunnilega missti alveg andlitið. Ég held ég hafi ekki búið til mynd í líkingu við þetta fyrr en ég fór í Húsmó og þá var ég orðin nokkuð gömul.

Idol

2005-04-27T08:52:00.000Z

í gær þegar ég sótti Sigurgeir í skólann.
Hann fór í próf á klarinettið í gær, ég veit svo sem ekki hvaða próf hann var að taka en hann náði öllu allavega en þetta fór sem sagt svona fram þegar hann var sestur í bílinn.

ég: hvernig gekk í prófinu
hann: vel
ég: náðir þú
hann: já öllu
ég: var Ian einn eða var prófdómari
hann: nei það voru líka tvær konur og ég var alveg að fara að hlægja þegar ég var að spila
ég: nú af hverju
hann: þetta var alveg eins og í Idolinu

Selma

Grænt

2005-04-26T15:48:00.000Z

Ég var 4 daga í burtu um síðustu helgi og það var bara allt orðið grænt þegar ég kom til baka. Tréin eru meira segja að verða græn. Svo ég fékk auðvitað græna fingur og er alveg búin að þrífa eitt beð sem er ca 1x1. Mér fer auðvitað fram því ég hef nú ekki þurft að sinna þessu mjög mikið í gegnum árin. Ef mér tekst að klára eitt svona á dag þá verð ég að öllum líkindum búin í haust :)

Selma

Góð helgi

2005-04-25T11:59:00.000Z

Meiriháttar helgi og við komin heim.

Helgin var í alla staði æðisleg, margt gert, en ekki nóg klárað og lítið um kaffiheimsóknir. Sigurgeir sá reyndar alveg um þann þáttinn, gisti á þremur stöðum og hélt mikla tónleika fyrir afa sinn og Höllu í Miðhúsum, ásamt því að hjálpa til í húsunum og þvo kýr og þess háttar. B-in komu í fermingarveisluna og ég "sendi" þá bara aftur suður samdægurs.

Verð nú að segja ykkur löggusögu:
Hún verður nú frekar sjaldan á vegi mínum en virtist vera eitthvað umhugað um það í gær. Byrjaði nú á því að þegar ég var á leiðinni út á Blönduós mæti ég ekki Blönduóslögguni, á sunnudagsmorgni uppúr níu, dísús enginn friður, ég var auðvitað á löglegum eins og "alltaf" og þar sem maður sér nú alls ekki inní "þennan" löggubíl gat ég bara ekki veifað fyrr en hann var farinn hjá, sá að þetta var hann Himmi og maður veifar alltaf þeim sem maður þekkir. Nema hvað skrapp fram í Langadal í hádeginu og þar var aftur löggan á ferð og svo fór ég að kenna á Skagaströnd og hvað haldið þið þá var hann Himmi þar og loksins gat ég veifað því þá var hann kominn á jeppann. Nema hvað ekki var nú öll sagan sögð því þegar við komum á Kjalarnesið þurfti löggubíll endilega að ná því að vera á UNDAN mér frá Grundarhverfinu og ég næsti bíll sem er alls ekki í frásögur færandi en ég fer auðvitað ekki fram úr löggubíl, ætti nú ekki annað eftir nema hann myndi hleypa mér fram úr sem hann gerði ekki enda keyrði hann á 90 og ég líka. Bíllinn eða maðurinn í bílnum á eftir mér var svo viðþolslaus að komast framúr að ég hleypti honum framúr. Hann hékk gjörsamlega aftan í löggubílnum að mér datt ekki annað í hug en að þeir myndu stoppa manninn og ávíta hann. Nei nei hangir þarna og lætur sig svo bara hafa það að taka fram úr og bless, horfinn. Og þeir blikkuðu hann ekki einu sinni. Nú ég næsti bíll komst að því að löggan keyrir bara alls ekki á löglegum, hún rokkaði þetta frá 90 uppí 105 og þá gerði ég það bara líka. En mest var ég nú hissa á þessum sem tók framúr og löggan hafði ekki einu sinni gefið honum stefnuljós um að hleypa honum. Jæja við förum örugglega öll alltaf eftir settum reglum er það ekki :-)

Selma

Mátti til

2005-04-20T22:20:00.000Z

Mátti til að setja hérna inn tvær myndir. Við fórum sem sagt fram og til baka sl. sunnudag í fermingarveislu til Jóns Árna sem haldin var í Flóðvangi. Það var æðislegt. Þeir voru þreyttir á leiðinni suður og sváfu alla leiðina.

Svo var árshátíð yngri barna í dag í skólanum og Ian vildi auðvitað að Sigurgeir spilaði og það var nú ekki málið. Það fyndna við þetta er að það virðist ekki vera neitt mál að standa þarna fyrir framan allt þetta fólk en það er svo mikið mál að fara í tónlistartímana í skólanum því það er svo mikið af "stórum" krökkum að ég fylgi honum alltaf alla leið. Skrítið. En þetta var auðvitað barasta flott hjá honum.

Á morgun ætlum við Sigurgeir að leggja land undir fót og halda norður, hann að heimsækja alla vini sína, hann er alveg búinn að skipuleggja þetta allt saman, eina nótt hjá Benna og eina nótt hjá afa og hvort við getum ekki verið líka þar sem var svo kyrrt og hljótt og þá meinar hann hjá Ólöfu og Jonna. Við byrjum allavega á að heimasækja sumarskemmtunina á morgun og svo vinn ég dálítið og kenni kannski líka. Sé til hvernig úr rætist og svo má auðvitað ekki gleyma aðalatriðinu, fermingarveislan hans Arnars Helga, við mætum sko í hana. B-in sem verða heima á morgun þeir fara bara fram og til baka á laugardaginn.

Selma

Spilað á klarinett

2005-04-20T22:18:00.000Z

Minn maður að spila á klarninett á árshátíð yngir barna í dag. Það var nú ekki málið.

Þreyttir ferðalangar

2005-04-20T22:17:00.000Z

Þreyttir ferðalangar, tekið á leiðinni suður sl. sunnudag, eftir frábæran dag í Flóðvangi.

Missti mig

2005-04-16T21:52:00.000Z

Jæja mín missti sig nú alveg í Debenhams í dag, dísús hvað ég hefði getað keypt mikið en sá ekki að ég hefði nokkur not fyrir allt það sem mig langaði í og mig sem langar yfirleitt aldrei í neitt og það leiðinlegasta sem ég geri er að fara að kaupa mér föt.

Nema hvað ég fór að kenna í Reykjavík í morgun sem er ekki í frásögur færandi nema það að ég ákvað að fara með nemandann út fyrir bæinn og tók veginn í áttina að Hafravatni og ætlaði niður í Mosó. Jæja við erum svo mikið að spjalla að ég tók ekki eftir afleggjaranum og við keyrðum og keyrðum og keyrðum og mér var nú ekki farið að lítast á blikuna. Þvílíkt skítaveður og ekki nokkur maður á ferðinni. Ég held svei mér þá að við höfum verið á leiðinni á Þingvelli svo ég sneri hið snarasta við og fann auðvitað afleggjarann á leiðinni til baka. Þvílíkt og annað eins en hún fékk allavega mjög góða æfingu í að keyra í brjáluðu roki og rigningu á hálendisvegi!

Nú þar sem við erum að fara í fermingarveislu NORÐUR á morgun þá var ég auðvitað alveg fatalaus og ákvað aðeins að skreppa í Debenhams og aldrei þessu vant þegar ég er búin að sjá draumapilisið þá kemur þessi líka aldeilis almennilega kona og býðst til að hjálpa mér sem endar auðvitað með því að ég er komin með 10 buxur og 10 boli/skyrtur og ég fór heim með fullan poka af fötum. Er ekki allt í lagi að ýkja um helming, hann var reyndar bara hálfur pokinn, en hefði getað verið fullur......

Svo maður er uppstrílaður í veislunni á morgun og líka um næstu helgi því þá förum við aftur NORÐUR í fermingarveislu.........

Selma

Til Þýskalands

2005-04-13T10:20:00.000Z

Á sunnudag ákvað ég að drífa mig til Þýskalands að heimsækja Önju, Bertil og Miru litlu og skellti mér á netið til að athuga verð. Jú jú það kostaði ekki nema 27.000 + skatta á mánudagskvöld en þar sem Beggi hélt ég gæti notað flugpunktana hans ætluðum við að skoða þetta í gær. Nema hvað það var nú allt upppantað í þau punktasæti svo ég ætlaði bara á visakortinu mínu en þá var verðið komið uppí 33.000 + skatta. Okei skella sér á það en þar sem Bjartmar var nú ekki alveg að lofa mér að dunda í tölvunni í gær ákvað ég að klára þetta bara í gærkvöldi en viti menn þá var verðið komið uppí 63.000 + skatta. Á örfáum klukkutímum. Ég ætlaði sko að nota uppstigningardag og koma á sunnudegi heim en breytti því, fer á föstudegi 6. og kem á mánudegi 9. heim og það kostaði ekki nema 25.000 + skattar.

Sýnir manni að maður á alltaf að skella sér á það sem maður sér fyrst.....

Selma

2005-04-10T21:06:00.000Z

.... hundarnir fíluðu ströndina alveg í botn líka.

2005-04-10T21:04:00.000Z

Fórum á "ströndina" um páskana, veðrið var reyndar ekki alveg eins gott og á Kanarí um jólin en þvílík fegurð og friðsæld....

2005-04-10T21:02:00.000Z

Já það má nota heita pottinn hérna á hvaða árstíma sem er eins og þið sjáið. Þetta fannst þeim bræðrum alveg óskaplega skemmtilegt.

Gera hvað

2005-04-09T21:44:00.000Z

Já spurningin hvað ég hef verið að gera þessa viku, jú ég kláraði iframe verkefni, sem er vefsíða með iframe ramma, what ever. Allavega er þetta í fjarkennsluáfanganum mínum í IR og þið fáið að sjá það fljótlega. Það tók nú tímana tvenna en kláraðist og er auðvitað svakalega flott. Nú svo er ég að kenna henni Evu Dögg pössunarpíunni minni. Ég hef kennt henni á kvöldin þar sem ég hef BARNAPÍU þá, þ.e. Beggi er heima hahahahaha.

Í gær fórum við í dúndurafmælisveislu til hennar Helgu Guðrúnar Albertsdóttur sem var 4 ára, þetta var nú reyndar eins og fermingarveisla eins og Jóhönnu er von og vísa og mikið svakalega er alltaf gaman að komast í afmæli á þann bæinn. Takk fyrir.

Á morgun byrja svo framhaldssaga í fermingarveislum, fyrsti í fermingu er sem sagt á morgun síðan er ferming fyrir norðan 2 næstu helgar. Geggjað og ég hlakka svo mikið til.

Annað er nú ekki fréttnæmt held ég - ég allavega man það ekki núna..............

Selma

Myndir

2005-04-04T09:11:00.000Z

Setti hérna myndir af mér með bikarinn og auðvitað er sko neðsta myndin sú fyrsta sem þið eigið að skoða og svo upp.......

Selma

Ég og Tryggvi með BIKARINN

2005-04-04T09:08:00.000Z

og svo auðvitað ég með sjálfum tamningamanninum Tryggva sem tamdi djásnið sem vann til þessara verðlauna, auðvitað gerði ég ekki neitt nema eiga hana.

Ég og Beggi með BIKARINN

2005-04-04T09:07:00.000Z

og svo auðvitað við gömlu saman með BIKARINN. við erum svo sæt!!!!!

Ég með BIKARINN

2005-04-04T09:06:00.000Z

ætlaði ég ekki að senda ykkur myndir af mér með BIKARINN, hér kemur ein af mér með bikarinn, hvenær skildi ég fá bikar aftur....

Kaffihús

2005-04-03T22:10:00.000Z

Ég verð nú að nefna það, við ákváðum að drífa okkur á kaffihús í dag þar sem MIG langaði svo ofboðslega mikið í djúsí köku og hún var auðvitað ekki fáanleg á mínu heimili svo við fórum á Kaffi Krús á Selfossi þar sem við nenntum ekki niður á Hafið Bláa sem er ferlega flottur staður hérna niður frá. Nema hvað það er auðvitað ekki í frásögur færandi nema að þegar við opnuðum dyrnar þá flæddi á móti okkur þessi svakalegi reykjarmökkur og mér varð á orði ands.... stybba er þetta og allir litu á mig!! Þetta er auðvitað fyndið að á svona pínulitlum kaffihúsum eru borð fyrir reyklausa í öðru horninu og borð fyrir reyk í hinu horninu og auðvitað þar sem staðurinn er svo lítill þá eru þessi tvö borð nærri hlið við hlið. Ég lét mig samt hafa það að anda þessum ferska ylmi að mér og auðvitað mátti restin að familíunni gera það líka. En ég ætla svo sem ekkert endilega þarna aftur.

Nú undanfarið hef ég dundað mér við það á kvöldin og alla helgina reyndar að klára nokkur framtöl fyrir vini og vandamenn og svo skaust ég til Reykjavíkur í dag til að kenna og leit aðeins við á sölusýningu Húnvetninga í Kópavoginum og hitti þar góða vini mína, voðalega gaman. Nú ég bara man ekki eftir neinu örðu merkilegu en það hlýtur að detta eitthvað inn á næstu dögum......

Selma

Vitið komið úr fríi

2005-03-31T10:14:00.000Z

Vá hvað er mikill munur að vera búin að fá vitið úr fríi, ég verð nú að segja það að ég er alveg óskaplega fegin en þetta gekk nú auðvitað ekki alveg þrautarlaust fyrir sig, fyrst var það nú aflgjafinn, svo var það móðurborðið eða hvað þetta nú heitir og ég endaði í að kaupa nýjan turn. En þar sem maður er svo heppinn að þekkja rétta fólkið þá benti hún Helga í Miðengi mér á hann Kristján sem bara REDDAÐI þessu öllu fyrir mig og nú er ég sem sagt komin í samband aftur. Dísús hvað ég er ánægð.

Selma

Vitið í fríi

2005-03-28T22:19:00.000Z

Jæja, þá ákvað vitið mitt að fara í frí og ég veit ekki mitt rjúkandi ráð þar til vonandi það verður komið aftur um hádegi á morgun. Tölvan mín ákvað nefninlega að nenna þessu ekki lengur og slökkti á sér í fyrradag og ég verð nú að segja það að ég er nú eiginlega höfuðlaus á eftir. Það er ég er alveg með höfuðið en það er bara ekkert í því. Sem sagt maður sér þegar tölvan er ekki lengur "mem" þá verður maður eins og höfuðlaus her. Eins og þið vitið öll þá er allt í tölvunni hjá manni og aldrei er nú verið að hafa fyrir því að taka afrit af þessu öllu saman en ég get nú eiginlega huggað mig við það að það er "kannski" bara einhver aflgjafi sem er farinn ekki endilega allt vitið, allavega vona ég það. Veit það um hádegi á morgun.

Nú er ég að hamra á tölvuna hans Begga sem ekki er með ADSL og jeminn það tekur allan daginn að bíða eftir síðunum að poppa upp svo maður nennir því nú ekki, gott ráð til að aftölva sig að fara í svona gamaldags tölvur en hér er búið að vera svo mikið að gera undanfarna daga að ég hef hvort sem er ekkert mátt vera að því að vera í tölvunni.

Fyrst komu Fanney, Óskar og krakkarnir hingað suður yfir heiðar og voru í bústað hérna á Núpi, þau komu svo í mat hingað á föstudaginn langa og mamma og Gummi bróðir og Ólöf líka og ég eldaði að sjálfsöðgu lambalæri áður en þau verða uppseld en það á víst að gerast í sumar segja blöðin. Ég var með þrjár mismunandi kryddtegunir á þeim, þ.e. lambalærunum ekki fólkinu og aldrei bregst það, ógó gott og vel heppnaður dagur. Virkilega gaman að fá fólk í mat, það er svo gaman að borða með skemmtilegu fólki ......

Strákarnir, þ.e. mínir og Fanneyjar, fóru allir í sund bæði á fimmtudag og föstudag og meira segja Bjartmar fór líka þótt hann væri með kvef. Ég held honum hafi ekki fundist neitt leiðinlegt en honum var víst eitthvað kalt því hann mátti ekki vera að því að vera alltaf ofan í vatninu og það var víst ekki 20 stiga hiti úti. En honum var ekki meint af.

Jæja á páskadag fórum við í fjöruferð hérna niður eftir og það var alveg svakalega gaman, alein í heiminum og Bjartmar vildi auðvitað bara strauja á haf út en við héldum aftur af honum. Við hefðum alveg getað verið þarna allan daginn því þarna sem við vorum sáum við ekkert nema hafið og sandhóla og það var fjara og þónokkuð brim þó það væri alveg logn. Sem sagt algjört æði og allir dauðuppgefnir þegar heim kom, meira segja hundarnir voru þreyttir eftir þessa ferð.

Í dag klifum við Sigurgeir og hundarnir Hamarinn og síðan skruppum við öll aðeins í kaffi í Kópavoginn og enduðum á Pizza Hut svona til tilbreytingar.

Og á morgun kemur vitið vonandi aftur.......

Selma

Takk, takk, takk, takk

2005-03-25T10:43:00.000Z

Já auðvitað gleymdi ég aðalatriðinu að þakka öllum fyrir alla hjálpina og við vorum í íbúðinni á Hæli hjá Jonna og Ólöfu og það var gjörsamlega geggjað, ekkert sjónvarp, ekkert útvarp, bara við sjálf enda þegar ég var búin að dásama þetta mikið fyrir Sigurgeiri þá sagði hann við Ólöfu, það er svo hljótt og kyrrt hérna, svo óskaplega gott að vera hérna. Svo merkilegt að honum var alveg sama um sjónvarpið þegar hann var búinn að fá að vita það að það væri bara ekkert sjónvarp, en ég varð nú reyndar að spila við hann lúdó í staðin og Erla Rut þurfti þess líka, en það var bara gaman.

Sem sagt takk takk takk Ólöf og Jonni, Erla Rut og allir á Helgavatni, Jobba og allir í Fagranesi og Guðrún og allir á Brekkbyggð 15.

Selma

Mikið að gera

2005-03-25T10:27:00.000Z

Vá maður er búinn að gera svo mikið!
Við fórum norður á laugardaginn og sáum sýninguna í Reiðhöllinni á Blönduósi, barasta flott og mjög gaman. Um kvöldið fórum við gömlu á árshátíð hestamanna og Guðrún og Gústi lögðu það á sig að vera með strákana alla nóttina og alveg fram að hádegi á sunnudag. Ég verð auðvitað að segja ykkur það að ég fékk verðlaun, sko ÉG pæliði í því. Ég átti efstu 4 vetra hryssuna í A-Hún á síðasta ári hana Hyllingu frá Blönduósi og ég fékk bikar. Vá hvenær skildi ég fá bikar næst. Ætla auðvitað að setja mynd af mér með bikarinn þegar hún kemur, þ.e. myndin svo bíðið bara róleg.

Beggi fór suður á sunnudeginum og við hin urðum eftir, þ.e. ég og strákarnir því á síðustu stundu aumkaðist Eva Dögg barnapía í Hveragerði til að passa hundana svo ég þyrfti ekki að dröslast með þá með mér og Jonni og Ólöf ekki að hlusta á gjammið í þeim. Ég sem sagt eyddi svo vikunni í að kenna að sjálfsöðgu og strákunum var komið fyrir á hinum ýmsu stöðum. Það er til svo mikið að góðu fólki þarna. Þetta gekk allt vel og strákarnir sem fóru í próf á miðvikudeginum náðu báðir, ég held að brosið sé enn á örðum þeirra.

Náðum nú ekki að heimsækja marga en fórum að heimsækja Boggu í Ömmuhús og þvílíkt flott hús og útsýnið maður, það er gjörsamlega algjörlega geggjað. Ætli séu ekki margir sem myndu borga mikið fyrir svona útsýni. Allavega ég pottþétt.

Enduðum í Miðhúsum á miðvikudagskvöld, allir þreyttir og alltof mikil umferð til að fara að keyra suður svo við gistum í Miðhúsum. Sigurgeir dreif sig á fætur í fjósið með frænda sínum og lenti í smíðavinnu svo hann var nú ekkert á þeim buxunum að fara heim en þar sem ég gat lofað honum sundferð með frændum sínum á Eyvindarstöðum þegar heim kæmi, þá lét hann til leiðast og það var þreyttur drengur sem sofnaði í sófanum í gærkvöldi.

Fanney og Óskar eru í sumarbústað hérna niðri á Núpi og ætla að koma í mat í kvöld ásamt mömmu og Gumma bróðir. Hinn stóri bróðir minn og hans fjölskylda fóru norður í Helgavatn í gær. Svo þetta fer svona sitt á hvað.

Meir síðar.......

Selma

Norður á laugardag, auðvitað

2005-03-17T10:07:00.000Z

Já er ekki best að nota tímann á meðan maður bíður eftir breytingum í skránni, þeir þurfa nú að breyta fram á síðustu mínútu. En held samt að þetta sé allt klárt núna og það er alveg 2 dögum fyrr en venjulega sem er frábært þá get ég kannski klárað verkefnið mitt í IR áður en við förum norður sem verður á laugardag, maður má aldrei missa af neinu. Það er einhver skemmtun hjá Sigurgeiri á föstudag í fimleikunum svo hann má ekki missa af því og við megum svo ekki missa af hestasýningunni á Blönduósi á laugardaginn svo við drífum okkur bara á laugardagsmorgunn og við gamla settið förum svo á árshátíðina um kvöldið þ.e. hestamanna. Það er svo gaman. Ég er meira segja búin að fá heila íbúð til leigu hjá þeim Ólöfu og Jonna á Hæli, því það fer öll fjölskyldan með þar með talið hundarnir sem er nú ekkert smá mál en ætli maður reyni ekki að hafa hemil á þeim í sveitinni. Maður fær nefninlega ekki alls staðar inni með marga hunda, held nú yfirleitt að maður sleppi ef maður tekur bara börnin með sér.

Ég má auðvitað ekki gleyma að segja ykkur að hér kom fullt af gestum um síðustu helgi, allir að norðan. Fyrst droppaðu Berglind og Jóhanna Björk í heimsókn á föstudagsmorgninum og svo komu Harpa og Valdi á laugardeginum, algjörlega frábært. Takk fyrir það.

Á sunnudaginn fórum við á hestasýningu í Reiðhöllinni í Víðidal, æskan og hesturinn og þar var mjög margt um manninn og mjög gaman. Alltaf svo gaman að sjá litlu púkana á hestbaki.

Og svo er þetta hefðbundna núna..........

Selma

Enginn tími

2005-03-15T11:55:00.000Z

Jæja Gústi minn bara til að láta þig vita að það er í lagi með okkur hérna sunnan heiða, vona það sama um þig!!!

Maður hefur bara engan tíma til að skrifa, skattframtal, verkefnið í IR sem tekur allan minn tíma núna og svo þarf ég að henda upp einni sýningarskrá fyrir hestakallana fyrir norðan ef þeir myndu nú ........ til að senda mér eitthvað til að hafa í henni.

Svo þar til næst.......

Selma

Veikur

2005-03-07T11:18:00.000Z

Það er auðvitað ekki fréttnæmt að einhverjir séu veikir en það er eiginlega hér því Bjartmar er veikur og 7,9,13 hann hefur aldrei verið veikur áður, nú liggur hann bara í sófanum og sefur. Kall anginn.

Nú ferðin norður var MJÖG góð, gerði alveg rosalega margt, fór á bingó og vann ekkert, fór til Hörpu E og vann mikið. Drakk mikið kaffi, lærði mikið á DW og töluðum mikið um heimisins mál auðvitað. Það var alveg rosalega frábært og í framhaldi af því er ég búin að skila verkefninu mínu í IR. Það fáið þið að sjá síðar!
Nú svo fór ég nokkra aðra bæi og fékk kaffi og svo kenndi ég auðvitað ekki má gleyma því.

Í dag er Reykjavíkurferð með Sigurgeir enn og aftur, vonandi lítur þetta betur út og ég verð að drösla Bjartmari með, skil hann bara eftir hjá mömmu á meðan.

Og hér er æðislegt veður..............

Selma

Flott hjá krökkunum

2005-03-03T22:24:00.000Z

Það var bekkjarárshátíð í dag hjá 2. bekk og ferlega flott hjá þeim. Sigurgeir fékk að vera kynnir, vissi nú að hann masaði útí eitt í tímum og hélt því að hann myndi standa þarna og segja brandara allan tímann en nei hann stóð sig mjög vel og ég var ákaflega stolt af honum, það er nú ekki alveg alltaf sem hann hefur viljað standa fyrir framan fullan sal af fólki, hann vildi allavega ekki taka þátt í fimleikamótinu sl. laugardag. En honum fannst þetta ekkert mál. Nema hvað þetta var virkilega gaman og svo var þessi svakalega fermingarveisla á eftir og ég bakaði auðvitað snúða, lang fljótlegast.

Bjartmar fílaði sig í botn þarna í matsalnum og steinlá svo úr þreytu þegar heim kom. Sem sagt mjög skemmtilegt.

Nú hér sit ég uppi með Border collie hvolp sem ég ætla að taka með mér norður á morgun, er sem sagt að fara norður að kenna og hann er svo stilltur og prúður og alveg voðalega sætur. En ég verð nú samt fegin þegar hann fer því hann pissar út um öll gólf, Bjartmar vill oftast þurrka það upp og ég er nú svosem ekkert of hrifin af því. Hann uppgötvaði það líka þ.e. hvolpurinn að Bjartmar er svona í svipaðri hæð og hann og fínt að leika sér við hann, toga í náttfötin og svona ýmislegt skemmtilegt sem Bjartmari fannst ekkert skemmtilegt. Hann þ.e. Bjartmar er vanur að geta hnoðast á hinum hundunum svo hann skilur þetta ekki alveg.

En sem sagt norður að kenna á morgun. Gaman gaman.......

Selma

2005-03-03T22:23:00.000Z

Ótrúlegt en satt, Sigurgeir var kynnir á bekkjarárshátíðinni í 2. bekk í dag og það var sko ekkert mál.

2005-03-03T21:57:00.000Z

maður er auðvitað langflottastur

Ég get sungið...

2005-03-01T22:38:00.000Z

Tónlistarkennarinn hringi í mig í dag og sagði að ég yrði að koma að hlusta á Sigurgeir spila sem ég og gerði. Hann er þvílíkt ánægður með hann að hann bara varð að láta mig hlusta á hann spila. Ég hef nú svo sem alveg hlustað á hann hér heima en svo sem ekkert spáð í það. Hann allavega spilar lag!!
Nú svo átti Sigurgeir að spila eitthvað lag með honum og ég hummaði með því hann sagði að það væri svo gott fyrir hann að æfa sig svoleiðis heima, ég sem kann engin lög en þegar ég var í sem mestu humminu sagði hann "ert þú ekki í kór, þú syngur svo vel" glætan maður að ég gæti sungið, hvað þá í kór. Ég get nú ekki annað en hlegið...... en Sigurgeir var frábær og ótrúlegt hvað hann er búinn að ná tökum á þessu klarinetti á svona stuttum tíma.

Selma

Reykjavík ó Reykjavík ......

2005-03-01T10:29:00.000Z

Get ekki sagt að það sé neitt að gerast hérna, fór alla síðustu viku til Reykjvíkur með Sigurgeir og aftur í gær, fór meira segja tvisvar í gær til Reykjavíkur, hvað munar manni um það. Þetta lítur vel út hjá Sigurgeiri og förum aftur á miðvikudag, ótrúlegt hvað hann hefur mikla þolinmæði gagnvart þessu, ekki viss um að ég hafi sömu....
Á laugardaginn var ég að kenna í Reykjavík, tveir piltar að norðan komu og námu umferðina í Reykjavík. Held það sé öllum hollt þó umferðin sé nú kannski ekki eins og maður vildi hafa hana. Þetta var mjög skemmtilegur dagur og þeir höfðu virkilega gaman og gott af þessu.

Á sunnudag var Bjartmari komið fyrir hjá mjög góðu fólki útá Álftanesi, nánar tiltekið hjá Alberti og Jóhönnu á meðan við fórum í bíó með Sigurgeir. Sáum Grímuna 2 og þeim feðgum fannst mjög gaman, ég hef nú meiri húmor fyrir einhverju rólegra.

Þannig að það var farið til Reykjavíkur alla daga í síðustu viku. Gaman gaman!

Nú það er próf aftur á fimmtudag á Selfossi og ég get nú ekki sagt annað en það að ég sé bara virkilega stressuð. Svo eru 3 strákar að fara í bóklegt próf á Sauðárkróki á morgun og það gengur örugglega mjög vel hjá þeim og svo er þá að skella sér norður til að láta þá klára þetta. Ekki hægt að vera próflaus endalaust!!

Nú ætli sé ekki rétt að fara í að reyna að klambra þessu verkefni saman fyrir IR, ég er reyndar ekki alveg að skilja það en það kemur, verst hvað fer rosalegur tími í að reyna að skilja það......... en eins og allir vita þá er tími manns mjög dýrmætur.

Selma

Grátandi heim

2005-02-22T21:42:00.000Z

Jæja við fórum bara grátandi heim úr þessari læknisheimsókn í morgun. Ekki veit ég hvað kom yfir mig en ég hafði greinilega verið í algjöru bjartsýniskasti um að þetta væri nú alveg síðasta heimsókn okkar til læknisins en nei gúd hevens maður. Ekki var læknirinn fyrr farinn að taka fyrsta sauminn úr en út vall þið vitið...... Mér féllust hendur og Sigurgeir greyið öskraði eins og stunginn grís þarna allan tímann og við sem vorum nú búin að segja honum að þetta væri búið, bara að taka saumana úr og hann væri orðinn fínn. Ömurlegt, við fórum og keyptum okkur mikil og stór verðlaun á eftir, þ.e. bæði fyrir hann og Bjartmar, svo sem ekki neitt fyrir mig! Nema hvað aftur eigum við að mæta á morgun til að hreinsa þetta og vess só gúd alla þessa viku. Ég verð nú bara að segja það það er eins gott að maður á ekki heima lengra frá en þetta!!!!!!

Sigurgeir greyið var nú samt sendur í flaututíma og kom grátandi heim úr honum en gat nú samt alveg farið og heimsótt Jóhann vin sinn sem er búinn að vera fótbrotinn í nærri 6 vikur, það er nú að lagast líka sem betur fer.

Nú af kennslumálum mínum er það að frétta að ég er að senda minn fyrsta nemanda hér á þessu svæði í próf á fimmtudaginn og ég er orðin svona létt stressuð yfir því. Ekki það að ég haldi að henni gangi illa, ég bara held alltaf að ég ætti að gera aðeins betur áður en ég sendi þau frá mér en sjáum hvað setur.

Selma

Svo þreytt

2005-02-21T10:13:00.000Z

Ég er alveg ofboðslega þreytt í dag, ég skrapp norður á föstudaginn og kenndi ALLA helgina og komst eiginlega ekkert í kaffi neins staðar, æææ bara næst vonandi. En þetta var auðvitað mjög gaman eins og alltaf en maður getur nú orðið þreyttur á að vera útí bíl frá 14.00 á föstudegi til rúmlega 21.00 á sunnudagskvöldi. Enda nenni ég ekki einu sinni að setja í þvottavélina núna.

Þannig að ég bara man ekki eftir neinu nema að Sigurgeir er að fara til læknis á morgun til að láta taka saumana úr, vonandi þurfum við ekki að bíða neitt voðalega lengi. Það verður nú samt ekkert voðalega gaman hann er orðinn svo hvekktur á eyranu að það má ekki koma við það þannig að það verða sjálfsagt miklar samningaviðræður í gangi á morgun með þetta. Sjáum hvað setur.

Annars held ég fari bara að leggja mig með Bjartmari núna.

Selma

2005-02-17T10:54:00.000Z

Bjartmar er auðvitað búinn að læra að hella uppá því það er það sem hann sér mömmu sína gera allan daginn. Góður í uppáhellingunni !!!

2005-02-17T10:52:00.000Z

Nýjustu myndir af prinsunum. Bara svo þið gleymið ekki hvernig þeir líta út :-)

Tólf tímar

2005-02-14T21:22:00.000Z

Það tók ekki nema tólf tíma þetta aðgerðarferli hjá Sigurgeiri. Var nú svo bjartsýn að við yrðum komin heim um hádegi. Nei aldeilis ekki, fórum kl. 8.30 í morgun og vorum komin heim kl. 20.30 í kvöld. Ég skil nú ekki alveg þetta ferli en á föstudag þegar ég hringdi var mér sagt að koma kl. 9.30 því það væri bara einn á undan okkur. Já auðvitað var það ekki málið og við mætt kl. 9.30 og okkur var vísað inn á stofu og við skiptum um föt og alles, þ.e. Sigurgeir við hin þurftum þess nú ekki. Svo biðum við bara og biðum og enginn sagði neitt og við bara biðum og biðum og loks var okkur sagt að þetta yrði um hádegið og við biðum og biðum og loks var hann kominn inn á skurðstofugang uppúr 13.30 og um 14.00 fór hann inn. Kominn á vöknun fyrir 15.00 og við niður og biðum eftir að hann vaknaði og þá var kl. 16.00. Aðgerðin tókst mjög vel og allt í lagi með það en eitthvað fór þetta illa í hann og hann skilaði öllum svalanum sem hann fékk að drekka og var ferlega slappur og fékk ógleðislyf og vildi ekkert borða fyrr en uppúr 18.00. Búið að svelta krakkann frá því í gærkvöldi, hver þolir það.

Bjartmar var hins vegar mjög kátur með að fá að hlaupa þarna um gangana og við þreytt eftir því.

Þannig að það fór allur dagurinn í að bíða og allan þann tíma var okkur aldrei boðið neitt og aldrei sagt svo mikið hvort yrði bið eða ekki, hvað við gætum gert eða hvar við gætum keypt okkur eitthvað að borða. Við reyndar vissum það frá því í vor!

En maður á nú ekki að kvarta yfir þessum smámunum, það hafa örugglega fleiri þurft að fara í aðgerðir en við og þurft að bíða meira.

Sem betur fer gekk þetta bara allt saman vel og við erum komin heim og ætlum að vera heima á morgun og horfa á sjónvarpið. Og þá verð ég auðvitað að segja ykkur að það var playstation þarna og þar sem hún er nú ekki til á heimilinu þá lagðist Sigurgeir í þetta tæki frá kl. 9.30 og alveg þar til hann fór í aðgerðina. Engan veginn hægt að slíta hann úr þessu. En eins og þið vitið nú þá er ég ekki svo ýkja hrifin af þessum tækjum og hann fær eiginlega aldrei að fara í tölvuna hérna af því ég er að "vinna" á hana og þá fór hann bara að gera eitthvað annað. Hann er farinn að fjöldaframleiða teiknaðar myndir og það er alveg ótrúlegt hugmyndaflug sem hann hefur í þeim efnum. Ferlega gaman að sjá þær. Hann er búinn að teikna heilu bækurnar og skrifa sögu með hverri teikningu til að fara með handa vini sínum sem fótbrotnaði. Hann hefur greinilega mjög gaman af þessu þannig að ég held bara áfram að banna honum að fara í tölvuna, virkar greinilega í virkjun á öðru efni.

Selma

Gleymin

2005-02-11T16:38:00.000Z

Þá er búið að storma niður á Landspítala og hitta þar lækna fyrir aðgerðina á mánudaginn og allt gekk það nú vel. Þurfum ekki að koma fyrr en kl. 9.30 á mánudagsmorgunn og vonandi þurfum við ekki að bíða fram að hádegi eins og síðast. Þá svaf sá fyrsti yfir sig..... en við reynum að vakna eldsnemma og hafa okkur klár í slaginn.

Nú svo var flaututími í dag en þar sem minniskubburinn minn er orðinn fullur eða eitthvað þá misminnti mig um tímann hvort það ætti að vera hálf tvö eða tvö svo ég tók sjensinn kl. tvö og það var auðvitað kolrangt. Sigurgeir fékk samt 10 mín. og nú er ég búin að setja þetta í símann minn - minna mig á kl. hvað þetta er á þriðjudögum og föstudögum. Ætla sko ekki að klikka á þessu aftur!
Fimleikarnir núna á milli 16.30 og 18.30 - maður getur bloggað á meðan. Sigurgeir er heila 2 tíma á föstudögum í fimleikum enda sofnar hann yfirleitt yfir Idolinu, enginn smá dagur í lok vikunnar, ég væri eflaust sofnuð fyrir kvöldmat ef dagurinn væri svona hjá mér.

Búin að panta á Línu langsokk á sunnudag fyrir okkur rauðhausana því það á að fara að hætta að sýna hana og ég er löngu búin að lofa að fara með Sigurgeir og af því ég ætla norður um næstu helgi þá verð ég auðvitað að fara núna.

Selma

Nammi nammi namm

2005-02-09T14:40:00.000Z

Nammi nammi namm saltkjöt og baunir, allir sem gátu mættu hjá mömmu í gærkvöldi í saltkjöt og baunir. Mikið ofboðslega er þetta góður matur og ég tala nú ekki um þegar maður þarf ekki að gera neitt sjálfur. Þetta var sem sagt mjög notaleg kvöldstund og þótt Bjartmar hafi farið seint að sofa ákvað hann að vakna kl. 6 í morgunn, sennilega ekki þolað þetta saltkjötsát!!! hann reyndar borðaði ekki neitt af því.

Nú en við Sigurgeir söknum auðvitað Blönduóss í kvöld (sem og aðra daga) þar sem þar er grímuball en ekki hér, það er barasta ekkert hér, bara starfsdagur í skólanum og EKKERT um að vera, fúlt..........

Selma

Mamma að passa!

2005-02-07T09:53:00.000Z

Það er nú ekki að spyrja að þessum mömmum þær redda þessu bara. Mamma sem þolir varla hunda kom og var hérna að passa Bjartmar svo við fengjum frið fyrir honum um helgina og auðvitað fylgdi hundapössun með. En hún lét sig hafa það og mikið ofboðslega var gaman á Þorrablóti, ég hef ekki hlegið svona mikið síðan á síðasta blóti s.s. fyrir ári síðan. Við fórum reyndar ekki fyrr en um hádegi á laugardag og vorum komin kl 18.00 í gær í hreint ógeðslegu veðri og það var auðvitað algott fyrir norðan og langverst hérna á Sandskeiðinu og Svínahrauni. Barasta ógeðslegt. Ég hefði ekki viljað vera útigangshross.

Nema hvað ég átti auðvitað eftir að klára verkefnið í fjarnáminu í Iðnskólanum í vefsíðugerðinni þar sem ég átti að skila því í gær. Fékk auðvitað "smá" aðstoð frá Hörpu E. og skellti því svo bara í gegn og steinsofnaði svo bara kl. 22.00. Dí hvað maður verður þreyttur eftir eitt þorrablót. Greinilegt að maður er ekki vanur.

Svo er bara að drífa mömmu heim í dag og reyna að komast í rest af afmæli hjá Þórgný, spurning með bollurnar, ekki nenni ég að baka þær.....

Selma

Klarinett og blokkflauta

2005-02-03T09:55:00.000Z

Hér gerist bara ekki neitt þessa dagana nema við erum nú svona að plana að fara norður á þorrablót. Aðalmálið eins og alltaf þegar á að fara eitthvað eru nú blessuð gæludýrin á heimilinu, ekki eitt heldur tvö og nú er enginn Höddi og Sigga í næsta húsi. Varla að maður nenni að drösla þeim, þ.e. hundunum, norður með sér. Slæmt ef maður kemst ekki á blót útaf hundum....

Sigurgeir fór aftur í flaututíma á þriðjudaginn og ég skildi hann auðvitað bara eftir og fór með bílinn í VÍS til að fá beiðni um nýja framrúðu, búið að grýta mig tvisvar á Skagastrandarveginum í haust, hmmmmm. Nema hvað þegar 20 mín eru liðnar þá hringir kennarinn, hann Ian og biður mig að koma. Jæja hugsa ég þetta hefur þá ekki gengið. Þegar ég kem er minn maður bara að spila á fullu á þetta klarinett tæki, sem ég get ekki einu sinni blásið í, og Ian er þvílíkt ánægður með hann. Sigurgeir er búinn að æfa sig alla daga síðan og Bjartmar hjálpar til á blokkflautuna, sérstaklega eyrnvænt!!!

Selma

Enn á ný ný vika

2005-01-30T22:22:00.000Z

Þá er enn ein vikan búin og ný hafin, þetta virðist vera alltaf sami hringurinn, skildi enginn hafa tekið eftir því nema ég!!

Viðtölin gengu fínt auðvitað, Bjartmar var bara þokkalega þægur í sínu viðtali og fékk sprautu, Sigurgeiri leist reyndar ekkert of vel á það en það hafðist allt. Nú Sigurgeir fékk mjög góða umsögn í skólanum, hann "á það til" að vera fljótfær og drífa þetta af svo hann komist í næsta verkefni en er orðinn góður í lestri og stærðfræði en finnst nú ekki eins gaman að skrifa. Svo það er nú bara allt í góðu gengi. Hann byrjaði líka í klarinett á föstudaginn og finnst það mjög spennandi.

Ég hef hins vegar legið yfir heimasíðunni "minni" sem við Harpa E. erum að gera eða sko Harpa hún sér nú alveg um þetta ég sendi henni texta eða mynd svona öðru hverju og svo mösum við saman á msn-inu um þetta allt saman. O það er svo gaman að vera saman á msninu.......
Inn á milli er ég svo að setja mig inn í Dreamweaver sem er næsta verkefni mitt í fjarnámi í Iðnskólanum en það er einmitt að læra að búa til vefsíður og ýmislegt því tengt. Mér sýnist þetta vera mjög spennandi sem tekur auðvitað alveg mjög mikinn tíma en eins og allir vita þá hef ég nóg af honum því ég er bara heima.

Já ekki má gleyma því að við Hrafnhildur og Magga hittumst og ég verð nú að segja það að það var alveg meiriháttar, gaman að sjá þær aftur og knúsa þær og spjalla yfir kaffi og kökum. Hreint alveg æðislegt, takk fyrir stelpur.

Í dag var gestadagur sem byrjaði kl. 12.30 (ég var ekki búin að baka) en þá komu Njáll frændi minn og hans fjölskylda. Hann var að prufukeyra nýjan Landrover fyrir umboðið (held ég) og tók sér auðvitað rúnt í Hveragerði en ekki hvað - það er nú yfir heila heiði að fara. Svo komu Solla og Valdi og börn og fengu hér mikið af kökum og kaffi og mikið spjallað og spekulerað. Þannig afskapleg skemmtilegur gestadagur og nú liggur maður í tölvunni.......

Selma

Viðtalsvikan

2005-01-26T09:26:00.000Z

Þetta er viðtalsvikan. Í gær fórum við Sigurgeir til læknis, í dag fer Bjartmar í eins og hálfs árs skoðun og á morgun er foreldraviðtal og svo er ég búin að vera í mörgum viðtölum við Hörpu E.

Nú það er nú komið rúmt ár frá því við fórum fyrst til læknis útaf þessu og ennþá er þetta ekki orðið gott. Það var sem sagt framleiðslugalli á Sigurgeiri og hljóp ígerði í einhver göng við eyrað, nenni nú ekki að útskýra það meir, sem endaði með aðgerð á þessu sl. vor en þar sem var svo mikil ígerð í kirtlinum (fitukirtill sem lokast ekki) þá náðu þeir honum ekki alveg svo þetta hefur verið að poppa upp af og til alveg til þessa. Ég gafst upp og við fórum aftur í gær og þá sagði læknirinn að það væri best að hann færi í aðgerð aftur til að taka þetta og þá ætti þetta að verða gott. Þannig var nú það. Sigurgeir er búinn að fá margar spurningar útaf þessu og hann segir bara núna, ja ég fæddist með þetta og það er jú alveg satt.

Svo er að bruna í Hafnarfjörðinn í kvöld að hitta Hrafnhildi og Möggu og ég verð nú að segja það að ég get ekki beðið.

Selma

Fór norður

2005-01-24T10:53:00.000Z

Skellti mér norður um helgina, EIN, var að kenna svo ég skildi alla kallana eftir heima, þeir hafa svo gaman af því þegar ég fer í burtu!!!!

Fór noður á föstudegi og náði að festa mig í skafli á fyrsta bænum sem ég kom á, fín byrjun á ökukennslu. Strákarnir á bænum komu bara og drógu litla sæta bílinn minn upp, hann er nú ekki mikið fyrir snjó blessaður og greinilegt að það er ekki gert ráð fyrir því að þurfa að draga þennan bíl því það er hvergi hægt að binda í hann. Nema hvað ég náði að kenna 2 strákum 4 tíma á föstudagskvöldið og aftur á laugardeginum. Og þar sem maður er svo fljótur að gleyma hvar snjórinn ákveður að hvíla sig þá auðvitað festum við okkur aftur á laugardeginum. Þá hringir maður í bestu vini sína, þ.e. þá sem eiga JEPPA og þeir koma manni til bjargar, takk Höddi, hálf neyðarlegt að sitja fastur í skafli með ökunema með sér í bílnum. Ætli maður verði ekki bara að fá sér jeppa, maður er auðvitað ekki maður með mönnum nema eiga einn slíkan.

Ég komst svo í kaffi á nokkra staði, auðvitað ekki alla en takk fyrir kaffið. Sunnudagurinn var svipaður, kenna svolítið og síðan kaffi og KÖKUR á Árbakknum með saumó, það var æði, æði. Svo bara brennt suður í þessu leiðindafæri sem var, en sem betur fer ekki rok, bara hálka sums staðar.

Nú svo er bara þetta hefðbundna nú í morgun nema að það er starfsdagur í skólanum svo Sigurgeir er heima.
Kannski maður drífi sig eitthvað eftir hádegið ef veðrið helst gott.......

Selma

Geggjað veður

2005-01-19T17:46:00.000Z

Jæja þetta er nú meira skítaveðrið, ekki hundi út sigandi enda hefur Perla ekki viljað fara út úr húsi hvað þá við. Og skaflarnir oj bara, við nenntum ekki einu sinni út til að fara í fimleika, bara liggjum og horfum á sjónvarpið.

Bjartmar er búinn að uppgötva að stólarnir ALLIR eru færanlegir og þeir eru nú á ferðinni allan daginn, ýmist inní sjónvarpsherbergi, eldhúsi, stofu eða forstofu. Uppgötvaði að hann gæti nú bara alveg sjálfur opnað sjónvarpsskápinn bara með því að ýta stólnum þangað, fara upp, sjá að það passaði ekki alveg, fara niður, prófa aftur og opna hurðina, fara niður, færa stólinn fyrir hina hurðina, upp og opna hana líka. Þetta var alveg stórsniðugt og geta svo fiktað í öllum tökkunum sem eru búnir að vera lokaðir inni lengi, eða maður nær ekki í þá. Þvílík uppgötvun ég tala nú ekki um uppvaskið og ýmislegt fleira sem er skemmtilegt með þessa stóla. Mamma gamla ekki eins hrifin!!!!!

Selma

Gestir og afmæli

2005-01-16T17:18:00.000Z

Vá æðislegt það komu gestir í gær en það voru Albert, Jóhanna og börn. Það var voðalega notalegt og af því hann hafði nú vit á að hringja á föstudagskvöldið til að boða komu sína þá snaraðist mín til að baka í gærmorgun, maður verður nú að eiga eitthvað með kaffinu.

Í gærkvöldi dreif ég mig svo í fertugs afmælið hennar Hrafnhildar, maður má nú aldrei missa af neinu. Hún hélt uppá það heima í litla húsinu sínu í Hafnarfirði. Alveg ágætasta útsýni úr því húsi. Það sem kom mér nú mest á óvart voru dætur hennar tvær, Jón Þór var ekki heima, þær eru orðnar fullorðnar. Ekki veit ég hvenær ég sá þær síðast en það er greinilegt að það er mjög langt síðan því ég hefði ekki þekkt þær útá götu svo mikið hafa þær breyst en samt mikið líkar mömmu sinni. Aldeilis fínt partý hjá henni, takk fyrir það.

Nú svo er ég bara ennþá að dunda við textann á heimsíðuna mína, þetta fer alveg að koma Harpa mín þ.e. Harpa E ekki Harpa H.

Selma

Sammála Nöldra

2005-01-14T22:19:00.000Z

Ég verð nú að segja það að ég er nú svolítið sammála Nöldra á Húnahorninu með niðurstöðu spurningu vikunnar þar sem fram kemur að fólk vill frekar hafa lágvöruverslun með takmörkuðu vöruúrvali á Blönduósi. Ég verð nú að segja það að fólk veit nú bara ekki hvað það er að tala um fyrr en það kemst að því. Ég man ekki betur en að það hafi allt orðið vitlaust þegar Mjólkursamsalan keypti MH og kom með óætu grænu súrmjólkina og hætt var að selja grænu súrmjólkina frá KS (hún er sko í grænum umbúðum, ekki græn!!) í Kaupfélaginu/Húnakaup. Það varð allt vitlaust því það vildi enginn kaupa þessu vondu súrmjólk frá MS svo þeir í KH urðu bara að gjöra svo vel að halda áfram að kaupa inn þessa frá KS.

Ég hefði örugglega líka viljað lágt vöruverð ef ég væri ekki búin að komast að því hvað það er ógeðslega pirrandi að hafa lítið vöruúrval en hér í Hveragerði eru tvær búðir, Bónus "auðvitað" og Hverakaup og það fæst ekkert í Bónus nema það sem hægt er að koma í stórar pakkningar og Hverakaup er frekar lítil búð en hún er allavega með fleiri tegundir EN aldrei það sem manni vantar og þá þarf maður í Nóatún á Selfossi (og hún er ekkert sérstaklega ódýr, samanber samanburð á mjólkurlítra) til að finna það sem manni vantar og það er stundum ekki til þar heldur. Getur það farið í taugarnar á manni þegar maður er búinn að skrifa niður á miða hvað maður ætlar að nota í þessu fáu skipti sem maður gerir eitthvað annað en þetta venjulega og það fæst ekki í búðinni næst manni.

KH eða Húnakaup hefur nefninlega staðið sig með prýði hvað vörutegundir varðar og ég held fólk átti sig ekki alveg á því fyrr en á reynir. Vöruverð kannaði ég svo sem aldrei því ég var ekkert að pirra mig á því, það kostar líka að keyra lengri leiðir eftir vörunni sem mér finnst nú ansi oft gleymast.

Selma

Súkkulaðimúss

2005-01-10T22:05:00.000Z

Dí maður hafið þið nokkurn tíman dottið ofan í súkkulaðimúss-skál og ekki getað hætt. Það kom fyrir mig í dag og ég er með uppí háls. Það var nefninlega svolítill afgangur af dessertinum síðan á laugardag þegar Gústi kom í kvöldmat til okkar og ég stóðst ekki skálina í dag og hellti mér í hana. Málið er að mig langaði svo rosalega til að gera dessertinn sem Jói Fel (var samt ekki að spá í hvar hann færi í sturtu) gerði 6. des. sl. sem er með 300 gr af 70% súkkulaði og hann er ógeðslega heví maður en ef maður fer og fær sér svona GÓÐA matskeið á háfltíma fresti þá er hann geggjað góður og það var sem sagt það sem ég gerði í dag og mig langar nú ekki í meir ég verð að segja það en það er ennþá svolítið til af honum, nóg til laumast í skálina á morgun.

Annars er nú bara ekkert að gerast hér nema snjór en hann er víst alls staðar .....

Selma

Ferðasagan

2005-01-05T21:26:00.000Z

Sá eini sem þurfti að fara í vinnuna í dag var Sigurgeir greyið og það tók tímana tvenna að vekja hann þótt hann væri búinn að sofa frá því uppúr 18 í gærkvöldi. Við vöknuðum auðvitað fyrir allar aldir 5.30 í gærmorgun til að fara í flug og ég hélt hann myndi nú sofna í flugvélinni heim en nei alls ekki, hélt sér vakandi alla leiðina og steinsofnaði svo í bílnum á Hellisheiðinni og var borinn inn sofandi og svaf alveg til 7 í morgun. Dagurinn fór svo í að ná í Perlu austur í Landssveit og koma við hjá Helgu að kíkja á hvolpana hennar Brellu. Flottir og skemmtilegir.

En eitthvað úr ferðinni, hmmmm..... allavega hef ég komist að því að upphituð sundlaug er ekki sama og upphituð sundlaug. Upphituð sundlaug á mælikvarða ÞEIRRA er ekki sama og upphituð sundlaug á mælikvarða OKKAR. Sundlaugin við hótelið var sem sagt skítköld allan tímann en átti samt að heita upphituð.

Nú í sjálfu sér gerðum við eiginlega frekar margt og ekki neitt, við fórum á markað í Mogan á aðfangadag eins og ég sagði ykkur um daginn og það var afskaplega gaman, við fórum í alla dýragarða, það fóru allavega 3 dagar í það. Við ætluðum að fara og skoða hellana en leigubílstjórinn neitaði að keyra okkur þangað því það væri heilir 30 km þangað og kostaði alltof mikið fyrir okkur, hann vissi greinilega ekki að við værum Íslendingar og þá skiptir engu hvað hlutirnir kosta en af því það var engin skoðunarferð þangað á vegum ferðaskrifstofunnar þá ætluðum við bara að fara þangað sjálf og þar sem við leigðum ekki bíl þá ætluðum við bara með leigubíl. Maðurinn kunni nú enga ensku, þeir kunna frekar þýsku heldur en ensku því allt fullt af þjóðverjum þarna og þegar hann var loksins búinn að skilja hvert við vildum fara vildi hann ekki fara og við sem sagt fórum ekki neitt í hellana, eins og mig langaði nú. Jæja en innfæddir, eða allavega þeir sem búa þarna tala ekki mikla ensku en tala flestir þýsku fannst mér.

Svo var farið á ströndina, sem var nú ekki langt frá, þar sem ekki var hægt að vera í sundlauginni og Sigurgeir hefði getað verið allan daginn þar, verra með Bjartmar hann var eitthvað svo mikið fyrir að fara eitthvað annað en hann átti að gera.

Nú svo fórum við auðvitað í öll þau MALL sem við gátum fundið (eins og allir hinir Íslendingarnir) og þau eru nú mörg og mismunandi. Þar er auðvitað mesta fjörið á kvöldin, sérstaklega við Yumbo og Kasbah en við fórum nú oftar í Yumbo á kvöldin, bara svona til að labba um og kíkja á alla þessa listamenn/sölumenn sem eru með vörur sínar til sölu, mjög skemmtilegt. Hins vegar eru verslunarmennirnir afskaplega leiðinlegir þar, það liggur við að þeir ráðist á mann og draga mann inn í verslanirnar og bjóða manni svo eitthvað fallegt, á special price just for you my friend. sumir voru svo góðir að þeir voru meira segja búnir að leggja það á sig að læra "íslensku". Nú ef maður asnaðist til að stoppa þá komu þeir um leið og spurðu hvað maður vildi borga fyrir þetta og þegar maður labbaði í burtu þá snarlækkaði verðið, ekkert mál að fá verðið lækkað um leið. Ekki alls staðar þó og margir voru bara ágætir og réðust ekkert á mann. Þetta var allt í lagi svona til að byrja með en svo verður þetta hundleiðinlegt til lengdar. Best var að versla í Cita þar var fólk svona frekar normalt.

Við Kasbah sáum við alveg frábæran listamann. Hann málaði myndir með spreyi. Var þarna með sýningu á því hvernig hann gerði myndirnar og það var alveg ótrúlegt hvað hann var flinkur og myndirnar voru alveg geggjaðar.

Veitingastaðir eru gjörsamlega á hverju strái, þ.e. á kaktus, ekki svo mörg strá þarna en kaktusar lifa þarn góðu lífi. Maður fær samt leið á að fara út á hverju kvöldi með smábarn, bíða eftir matnum og bíða svo eftir reikningnum, Bjartmar hafði nú ekki alltaf þolinmæði í þetta en skemmtilegasta kvöldið var án efa aðfangadagskvöld þegar við fórum á bei lelo sem er þýsk/spænskur staður (ekki hollenskur eins og sagt var hér fyrr) og þjónarnir skiptust á að skemmta Bjartmari og Sigurgeir var svo upptekinn af kettinum sem var þar að maður hafði bara alveg frið við að borða. Ég mæli eindregið með þessum stað (hann er í Yumbo, hinu megin við Klörubar), við fórum aftur á hann síðasta kvöldið og það er meiriháttar góður matur þar. Nú annar staður sem okkur þótti góður og skemmtilegur var Marco Polo í Cita, þar komu hljómlistarfólk og spilaði meðan við vorum þar (auðvitað þurftum við að borga þeim nokkrar evrur, en það var þess virði) og svo var einn ágætur í Sanita senter sem ég veit ekki hvað heitir, hann er lítill og frekar ódýr.

Sem sagt margt gert og ekki mikill tími í sólinni, helst þegar Bjartmar fékk sér hádegislúrinn en við vorum ekkert að stressa okkur á morgnana heldur tókum því rólega og hann fékk sér svo lúr og eftir það var farið á "djammið".

Nú við versluðum alveg heilósköp eða þannig, nei ég held við höfum verið bara frekar slöpp í þessu miðað við allar þær ferðatöskur sem fólk rogaðist með úr flugvélinni í gær. Jeminn. En ég keypti mér auðvitað hestastyttu sem ég sá þarna og VARÐ bara að kaupa hana. Maðurinn pakkaði henni agalega vel inn fannst mér svo ég skoðaði það ekkert aftur og rogaðist með hana með mér í handfarangri alla leið heim og opnaði svo spennt pakkann í gær og hvað haldiði, hún var auðvitað brotin, einn fóturinn af og þrjú lítil brot í eyranu. Mín ætlaði sko að finna brotin og leitaði af þeim eins og nál í heystakk (þetta var nokkuð stór kassi fullur af dagblaðaræmum, þið vitið dagblöð sem sett er í pappírstætara) og hvað haldið þið ég fann þetta auðvitað allt og nú er hann bara eins og nýr.

Sem sagt afskaplega góð ferð en afskaplega gott að koma heim aftur þó það sé snjór og allt á kafi. Það var sem sagt ekki farið í búðina í morgun að kaupa sér brauð og kaffið ekki drukkið á svölunum......

Selma

Komin heim

2005-01-04T21:24:00.000Z

Jæja þá erum við bara komin heim og vá hvað þetta var eitthvað fljótt að líða, eins og alltaf þegar maður fer eitthvað og dj.... snjór er hérna, við þurftum næstum að moka okkur inn!!

Heyriði og já takk fyrir kommentin en þar sem ég hef nú aldrei fengið komment þá datt mér sko bara alls ekki í hug að kíkja á þau á meðan ég var úti en takk takk og ég þurfti svo sem ekki að komast á netkaffihús því það var internetþjónusta á hótelinu en auðvitað héngu allir á netinu svo maður komst sjaldan þá stuttu stund sem maður hafði tíma sjálfur.

En nú er bara að leggja höfuðið á koddann og ferðasagan kemur senn......

Selma

Gleðilegt ár

2005-01-02T11:46:00.000Z

Bara stutt héðan, vildi bara óska ykkur gleðilegs nýs árs og takk kærlega fyrir það gamla.

Héðan úr sólinni er allt gott, stundum búið að vera peysuveður en annars bara fínt, það sem mér finnst best er að geta hlaupið út í búð á morgnana að kaupa nýtt brauð og kvöldin er æðisleg, maður fer út á röltið og þarf ekki að dúða sig inní úlpu og allt það. Svo er það gróðurinn maður, hér spretta kaktusarnir og allt það sem maður er að reyna að rækta heima í pottum eins og gorkúlur og ferlega gaman að sjá gróðurinn hérna.

En meira þegar við komum heim sem styttist nú óðfluga í, bara 2 dagar eftir......

Selma

Ljúft

2004-12-26T10:59:00.000Z

Vá hvað þetta er ljúft og ekki söknum við vetrarríkisins að heiman það er alveg öruggt. Gott að vakna á morgnana og fara út og setjast með kaffibollann, Bjartmar er reyndar nokkuð árrisull þó hann fari nú ekki að sofa á "réttum" tíma, hann vaknar samt um 8 leytið. Það gerir svo sem ekkert til. Við erum búin að rölta hér um og fara á ströndina auðvitað sem strákarnir fíla gjörsamlega í tætlur. Mikið er það notalegt, þar er oftast gola svo ég er nú ekki alveg að farast en EKKI úr bolnum auðvitað, það er ekki gott fyrir fólk að sjá svona mikið HVÍTT í einu. Nú aðfangadagur var ekki mjög hefðbundinn, við fórum á markað í Mogan og þar hefðum við getað keypt allt fyrir prútt, mjög gaman ef maður hefði verið í einhverri þörf fyrir að kaupa eitthvað en það var gaman og svakalega skemmtilegt mannlíf. Nú við fórum út að borða á aðfangadagskvöld og lentum á hollenskum veitingastað og þar sem við vorum mjög snemma (17.30, það fer enginn út að borða fyrr en um 20.00) þá vorum við ein og þar sem Bjartmar var ekki á því að sitja kyrr við borðið sáu þjónarnir um að skemmta honum, aldeilis frábærlega skemmtilegt. Síðan var bara spásserað um og skemmt sér til 21.00 og þá fórum við heim að taka upp ALLA pakkana sem við tókum með en það voru bara bækur og það er gott að hafa það notalegt með bók í hönd.

Annars er þetta bara frábært og geggjað notalegt þó það sé ekki sól allan daginn, það er allavega ekki rigning, ekki enn. Bestu kveðjur úr sólinni á Kanarí.

Selma

Gleðileg jól

2004-12-20T22:11:00.000Z

Gleðileg jól til ykkar allra og hafið það sem allra best.

Selma

Þá er komið að því

2004-12-20T22:01:00.000Z

Vá það er bara komið að því, flug á morgun. Mikið rosalega er tíminn fljótur að líða. Ég held við höfum keypt ferðina í júlí og svo er þetta bara runnið upp.

Sem sagt allt tilbúið, búin að koma jólapökkunum á sinn stað, fara með kortin í póst, koma hundunum fyrir hjá MJÖG GÓÐU FÓLKI og pakka niður. Er þá ekki bara allt tilbúið.

Við verðum á Club Sunshine Apt sem er bara vonandi fínt, þið getið séð það á sumarferðir.is þar er hægt að sjá videó af því. Nú svo ef vel gengur að losna við kallana til að fara í tölvuna þá sendi ég kannski línu úr sólinni. Adlrei að vita.

Selma

Ógó gaman

2004-12-16T09:29:00.000Z

Mikið rosalega var gaman að vera leynigestur í saumó!! Fór norður á þriðjudag því það voru 3 strákar í prófi í gærmorgunn og það gekk auðvitað alveg ljómandi vel, ekki að búast við örðu svo sem. Nú það vissu fáir af því að ég væri fyrir norðan svo ég rétt komst sem leynigestur í saumó sem mér fannst alveg svakalega gaman. Reyndar mætti ég Sigrúnu Sig strax þegar ég kom á Blönduós og aldrei þessu vant þá tók hún eftir því hverjum hún mætti og hringdi í Jobbu sem vissi auðvitað af því að ég væri á staðnum. Lofaði að segja ekki neinum. Svo þegar ég fór útúr bænum mæti ég ekki Tryggva og Harpa H. hringir svo skömmu síðar og spurði hvar ég væri því Tryggvi hefði séð til mín. Ég skrökvaði að henni að ég væri sko bara í Hveragerði. Nei nei Tryggvi hefði sko séð mig alveg örugglega því rauði hausinn var bara um allt. Ég bað hana innilega afsökunar á þessu þegar í saumó var komið. Mikið rosalega fannst mér nú leiðinlegt að skrökva svona. En það var alveg meiriháttar að hitta stelpurnar aftur, ALVEG MEIRIHÁTTAR stelpur, heyrið þið það.

Annars bara 5 dagar í flug.......

Selma

Fín ferð

2004-12-13T15:07:00.000Z

Já já þetta var aldeilis fín ferð norður og eins og fyrri daginn fær maður ekki frið á götum bæjarins en núna var það Þverbrautarliðið sem sá til mín og hringdu. Þau voru að úða í sig jólakræsingum á Árbakkanum og ég í það auðvitað.

Svo var bara kennt útí eitt en ég mátti samt vera að því að fara fram að Þingeyrum og kíkja á hrossin mín, varð auðvitað að fara og fylla mig af hestalykt til að fara með hingað suður. Hér er enga hestalykt að finna hahahahaha.

Komin heim seint og um síðir í gærkvöldi, það var algjörlega fljúgandi hálka frá Blönduósi og alveg niður í Norðurárdal þannig að textavarpið var bara alveg rétt aldrei þessu vant, maður fer nú samt ekkert eftir því frekar en fyrri daginn.

Á eftir er svo jólasýning fimleikafélagsins og basar svo ég þurfti að baka heila köku í morgun þegar ég vaknaði, ekki nennti ég því í gærkvöldi. Maður er nú svo sem ekki lengi að skella í eina köku svona þegar maður tekur sig til við það.

Selma

Norður jíbbí

2004-12-08T11:52:00.000Z

Já já norður um helgina að kenna, fer maður ekki bara í harkið þar fyrst maður fær ekkert hér. Verst að ég þarf eiginlega að hitta svo marga og gera svo margt að ég má bara ekki vera að því að kenna. Jæja finnum eitthvað út úr því.

En að örðu. Ég verð nú að kvarta yfir þessum KB banka hér, það er hvorki búið að mála hann bláan eða setja upp jólaseríur svona eins og gert er á Blönduósi auðvitað. En ég hef nú aldrei komið inní hann þannig að ég veit ekki nema inni séu heil kynstrin öll af jólaskrauti. Er nú samt að velta fyrir mér hvort þetta sé vegna þess að það eru miklu meiri peningar á Blönduósi heldur en í Hveragerði, ég er nefninlega ennþá með öll mín viðskipti í KB banka á Blönduósi. Kannski ég ætti að færa þau og sjá hvað gerist.

En hér gerist ekkert svo það er ekki hægt að skrifa um neitt. Er núna reyndar að komast á það stig að ég verði að fara að bögga einhvern til að passa hundkvikindið um jólin, ef einhver gefur sig fram þá yrði ég svakalega glöð. Annars neyði ég einhvern til að taka hana í fóstur.

Selma

Fimleikar og bakstur

2004-12-06T10:36:00.000Z

Jæja enn ein helgin farin framhjá og styttist óðfluga í Kanaríferð, jibbí, hlakka ógó til.
Nema hvað eins og sést á myndunum hér að neðan þá var heilmikið um að vera. Á laugardagsmorgun fórum við í fimleikafjörið í íþróttahúsið, Sigurgeir vildi auðvitað sýna okkur hvað hann er orðinn góður í fimleikum, ég sé hann nú reyndar frekar fyrir mér í kúluvarpi eða eitthvað en allar íþróttir eru af hinu góða þó ég sé nú ekki að eyða miklum tíma í þær,hmmmm.
Þetta var bara voðalega gaman en held Bjartmari hafi fundist skemmtilegast, hann hljóp þarna um víðan völl enda nóg plássið.

Allur sunnudagurinn fór í bakstur og Sigurgeir liðtækur í því, við skreyttum að vísu ekki piparkökurnar en það verður bara gert núna næstu daga. Svolítið góð mynd þessi efsta þar sem hver dundar við sitt, sumir lesa blöðin, aðrir spila á spil og aðalmaðurinn er auðvitað að búa til piparkökukarla og kerlingar.

Selma

2004-12-06T10:35:00.000Z

en aðrir á heimilinu fundu sér eitthvað annað til dundurs, hver með sitt áhugamál eða þannig.

2004-12-06T10:33:00.000Z

Síðan var sunnudagurinn tekinn í bakstur og Sigurgeir mjög liðtækur í því. Hann eiginlega gerði þetta allt saman, ég svona mæli í þetta....

2004-12-06T10:32:00.000Z

Og auðvitað sýndi Sigurgeir okkur hvað hann var búinn að æfa sig mikið í vetur og gat t.d. alveg labbað afturábak á þessari slá, ég hefði nú ekki leikið þetta eftir.

2004-12-06T10:30:00.000Z

Það var fimleikafjör á laugardagsmorguninn og við mættum auðvitað. Bjartmari fannst auðvitað rosalega gaman að hlaupa á stóru dýnunni. Ég lét það nú ekki eftir mér !

Jólaföndur

2004-11-30T22:21:00.000Z

Ég var svo gjörsamlega búin að gleyma hvernig ég ætti að setja myndir þarna inn og er sem sagt búin að berjast í því í kvöld "án Hörpu" og YES það tókst. Dj.... er ég klár. LOL.
Nema hvað það var sem sagt jólaföndurdagur hjá 2.bekk og auðvitað mættum við. Þau áttu sem sagt að búa til hvítt jólaskraut úr pappír og fórum við svo með það niður í Listasafn Árnessýslu og skreyta jólatréið sem þar var. Það var æðislegt, fallegt furutré og þau settu svo sín fínu listaverk á tréið og svo var tekin mynd af öllum hópnum. Bjartmar missti sig gjörsamlega í sölum hússins en í einum salnum voru 4 sjónvörp með einhverju listaverki í gangi (þ.e. eitthver sýning á dropum og hljóðum) og mesta fjörið var auðvitað að slökkva á tækjunum og maður mátti hafa sig allan við til að ná að bjarga því, honum fannst þetta EKKERT leiðinlegt.
Aftur var farið í skólann og þar voru skreyttar nokkrar piparkökur og þær síðan borðaðar.
Bjartmar var svo þreyttur eftir þetta að hann sofnaði fyrir hálf átta. Það var nú bara fínt.....

Selma

2004-11-30T22:19:00.000Z

og þessi líka

2004-11-30T22:18:00.000Z

myndir teknar í Listasafni Árnessýslu þar sem krakkarnir úr 2 bekk skreyttu jólatréið í dag.

Geggjaðir tónleikar

2004-11-28T21:54:00.000Z

Ég segi nú bara hvað varð um þessa viku, sofnaði ég eða hvað.
Nema hvað það var hvort sem er ekkert að gerast fyrr en í gær þá fórum við mamma á jólatónleika til stuðnings krabbameinssjúkum börnum í Hallgrímskirkju. Þeir voru gjörsamlega geggjaðir. Þar sungu Kristján Jóhannsson, Diddú, Jóhann Friðgeir, Birgitta Haukdal, karlakór Kjalarness og Fóstbræður. Bara aftur: gjörsamlega geggjaðir og ég myndi nú sko fara aftur.... ég er svo mikið fyrir það að fara oft á það sama. Alltaf í því sama eða þannig.

Annars er bara ekkert nema bara jólaljós hér og þar,þau eru svo notaleg, ætli maður verði að fara að baka....... kannski ekki í kvöld.

Selma

Góð námskeiðshelgi

2004-11-21T22:22:00.000Z

Vá hvað var gaman á námskeiðunum sem ég fór á um helgina. Ég byrjaði á föstudagsmorgun í hreint ógeðslegum kulda hér austur í sveitum, fyrir svona inniveru eins og mig þá var þetta sko alltof mikill kuldi í einu. Nema hvað ég var á námkskeiði hjá Magga Lár og Svanhildi Hall sem heitir "Meðhöndlun og mat á 1-4 v. unghrossum" og ég verð nú að segja það að mikið dj..... var það ógó skemmtilegt. Ég var mætt uppí Miðengi að sækja Helgu kl. hálf níu og mátti meira segja vera að því að sjá hvolpana hennar Brellu og fá mér gott kaffi. Svo var brunað að Brjánsstöðum á Skeiðum, eins og ég hafi nú vitað hvar þeir voru, en ég veit það núna. Námskeiðið tók allan daginn og var mjög skemmtilegt. Ég held meira segja ég gæti alveg notað það ef ég hefði einhverja hesta til að æfa mig á. Heim var ég komin kl. að verða hálf níu og þá var Sigurgeir búinn að hringja svona 100 sinnum hvort ég væri ekki að koma því ég var búin að lofa pizzu sem ég keypti svo bara á leiðinni heim. Mamma sem sagt bjargaði börnunum þennan daginn. Sigurgeir er nú greinilega alveg dottinn út úr því að láta aðra skutla sér því ég bað eina mömmuna að skutla honum heim úr skólanum og hann hringdi til að segja mér að það hefði verið leiðinlegt og hann ætlaði ekki að láta skutla sér í fimleika sem önnur mamma átti að gera og þar við sat, hún kom en hann neitaði alveg að fara með henni. Meiri maðurinn, hvaðan skildi hann hafa þennan þverleika....!

Á laugardag var svo námskeið hjá Ökukennarafélaginu og þar fékk maður að vita allt um nýjustu tækni og vísindi í sambandi við bremsukerfi og öryggisbúnað í bílum og ég segi nú bara maður þarf bara orðið ekkert að gera því tæknin er þvílík að hún tekur bara af manni völdin ef maður er að fara að klúðra einhverju. Jeminn. Mjög skemmtilegt námskeið líka.

Þið getið nú ekki ímyndað ykkur hvað við gerðum í dag, jú við fórum í bílskúrinn og drösluðum ÖLLUM kössunum hér inn sem höfðu ekki komið hingað inn fyrr og tókum uppúr þeim. Dagurinn fór nú allur í sortera draslið upp úr þeim, því var ýmist hent, aftur út eða varð eftir inni. Ekkert smá magn af drasli sem maður á og hvað á maður að gera við þetta allt saman.

Selma

Ekkert grænna hinu megin

2004-11-17T10:32:00.000Z

Já ég er nú búin að komast að því að það er ekkert grænna hinu megin, hér er sko allt á "kafi" í snjó og skítakuldi og eins og ég sagði um daginn þá hélt ég nú að það snjóaði aldrei hérna. Hélt að svona veður væru bara fyrir norðan!!!

Nema hvað ég fór norður um síðustu helgi og meikaði það! sem sagt grænna hinu megin!! þ.e. kenndi nokkra tíma, fékk engan frið á götum bæjarins með kaffiboðin svo ég reyndi að komast í kaffi til allra sem buðu mér og takk kærlega fyrir það. Svo bara suður aftur á mánudag.

Og svo skóli og aftur skóli núna, Sigurgeir fer í sinn skóla og ég hamast við að búa til myndir fyrir fjarnámið og svo ætla ég sko á hrossanámskeið á morgun með vinkonu minni Helgu. Það er einhvers staðar hér fyrir austan mig en hún hlýtur að rata því ekki geri ég það. Svo á ég nú eftir að fara og skoða hvolpana hennar Brellu og fara með Sölku til hennar því hún ætlar að fá hvolpa úr henni og svo og svo hlýtur að verða svakalega gaman á morgun að finna einhverja hestalykt loksins. Mikið rosalega hlakka ég til. Svo er annað námskeið á laugardagsmorguninn hjá Ökukennarafélaginu og það er nú rétt að maður mæti þangað líka, hafa þetta svona námskeiðshelgina miklu!

Nú annað er ekki markvert, skrapp aðeins til R. í morgun og datt aðeins inn í Garðheima og þvílíkt úrval af ljósum maður, annað eins hef ég nú bara ekki séð og ég hefði nú alveg getað keypt nokkur eða kannski bara svolítið fleiri en nokkur. En ég meiri segja keypti ekki neitt og fór bara heim.

Selma

Skóli

2004-11-12T22:50:00.000Z

Er skóli, ekki skóli, skóli eða hvað er í gangi þessa dagana. Allavega er ég að reyna að klastra saman mynd fyrir fjarnámið mitt í Iðnskólanum í Photoshop en það er algjört möst, alveg hrikalega gaman en tíminn maður sem fer í þetta, það er nú samt ekki eins og maður sitji hérna allan daginn því Bjartmar er svolítið duglegur þegar hann kemur hér inn í tölvuherbergi og ýmist kveikir eða slekkur á tölvunni þannig að hingað kemur enginn nema þegar Bjartmar er sofandi eða maður lokar á eftir sér og einhvern veginn á ég mjög erfitt með að hafa hann einan frammi með Sigurgeir - þannig engin tölva nema þegar hann er sofandi og þá er hann auðvitað látinn sofa sem mest á daginn...... hahahahahaha

Jæja á morgun er ferð með 1 stk hund í augnskoðun, hvað leggur maður ekki á sig fyrir þessi grey, spurning hvort hún þurfi gleraugu eða ekki. Nú svo held ég að ég bruni norður aftur, það er svo gaman fyrir norðan, það er eitt ökupróf eða svo. Þá er spurning er skóli, ekki skóli, skóli eða ekki, fær Sigurgeir að fara með eða ekki eða bara allir eða enginn........ framhald í næstu viku......

Selma

Mikið að gera

2004-11-09T10:25:00.000Z

Vá það er svo mikið að gera að maður hefur bara ekki orðið tíma til að skrifa á bloggið og þá er nú mikið sagt. Ég virðist hafa verið rosalega upptekin í síðustu viku en ég man nú alls ekki hvað ég var að gera. Jú það var skóli og það tók nú ekkert smá á að vekja mannskapinn kl. 7 alla daga vikunnar en þetta reddaðist í morgun þegar allir gátu sofið til 8, ég segi nú bara vei enginn skóli....

Nú við fórum auðvitað norður, fyrst með hundana í Miðengi og svo brunað norður í terturnar hans Magnúsar, mikið rosalega voru þær nú góðar. Við gáfum honum rollu af því okkur finnst hann eiga alltof fáar en þessi er reyndar til að hafa á vegg svona til að hann geti horft á hana þegar hann er inni svo hann gleymi ekki hvernig þær líta út. Flott afmæli en hann varð sem sagt 60 ára kallinn.

Á laugardag var svo heimsóknardagur, við sem sagt heimsóttum marga en alls ekki alla en við komumst auðvitað ekki yfir það allt á svona svakalega stuttum tíma en þetta var alveg meiriháttar ferð. Nú svo af því að kindin hans Sigurgeirs kom ekki af fjalli með lömbin sín og við fáum því ekkert að borða í vetur þá hringdi ég bara í SAH og þvílík þjónusta, maður bara pantar það sem maður vill og ég gat svo bara sótt eða látið senda mér kjötið en af því að ég var á ferðinni þá tók ég það auðvitað bara með mér. Þannig að suður í Kelfavík kl. 15.00 á sunnudag með bíllinn fullan af kjöti skyldi vera mætt til að ná í Tælandsfarann. Ekki málið, straujað suður án þess að stoppa, allt í lagi allir sofandi, en þar þurftum við svo að bíða í klukkutíma því fluginu hafði seinkað þar sem var svo mikil flugumferð yfir Atlandshaf. Ja svona veit maður nú aldrei neitt um. En hann kom og bíllinn var svo pakkfullur að töskurnar hans komust varla fyrir. Heim kl. 18.00 og allir þreyttir og geðvonskan eftir því í gær. Gúúd hevens.

Í gær fór ég sótti hundana og bíð núna spennt eins og Helga eftir að Brella gjóti, hún er sem sagt mamma Sölku okkar. Maður getur nú aldrei beðið eftir að sjá hvað koma margir, hvernig þeir eru á litinn osfrv.

Já og svo enginn skóli í dag þannig að nú er það bara blessað sjónvarpið.......

Selma

Norður um helgina

2004-11-01T22:22:00.000Z

Veiiiiiii norður um helgina, ég gat nú ekki beðið lengur og í kvöld hringdi ég nú bara og spurði hvort yrði ekki örugglega rjómaterta á föstudaginn því ég ætlaði að koma norður. Maggi á nefninlega afmæli og við ætlum sko að mæta í það! Þá er nú bara að koma hundunum fyrir, en það er sko miklu meira mál heldur en að koma börnunum fyrir en þau/þeir fara auðvitað með, skárra væri það nú, en Helga vinkona mín í Miðengi aumkaðist yfir mig og hefur hundana, það vill enginn fá mig í heimsókn með tvö börn og tvo hunda!

Annars er nú skóli, vá maður hvað var erfitt að vakna í morgun og koma skikki á þetta aftur, það mun taka alla vikuna og þá verður aftur verkfall, held við ættum að gera eins og Frakkar og mótmæla almenninlega þessu kennaraverkfalli, þeir eru svo helv..... góðir að mótmæla!!

Nema hvað það komu gestir að norðan í gær og stoppuðu lengi, meiriháttar og voðalega notalegt, ég meira segja gat tekið köku úr frystinum! Alltaf gott að fá gesti. Þeir komu nú kannski alveg gagngert að norðan til mín heldur var verið á námskeiði og ýmsum snúningum í henni Reykjavík og síðan var litið aðeins hérna alla leiðina austur fyrir fjall!

Nú svo er bara akkúrat ekkert að frétta nema það hundrignir hér í allan dag.

Selma

Tæland og aftur Tæland

2004-10-28T10:33:00.000Z

Guess what, aftur fór hann til Tælands, hvað er þetta eiginlega við Tæland sem er meira spennandi en Hveragerði...... þar er alltof heitt, alltof mikið af pöddum, alltof mikið af hrísgrjónum og pöddum sem detta ofaní matardiskinn, alltof mikið af ódýrum vörum og svo mætti lengi telja! og við hér hmmm ??

Á mánudaginn vissi Beggi sem sagt að hann var að fara til Tælands í gær, ekki par hrifinn en fór nú samt. Á flugmiðanum stendur að heimkoma sé 7. nóv en ég veit nú betur og segi + 10 þannig að hann kemur heim ca 17. nóv. Allt í lagi með það svo framarlega að hann komi fyrir jól eða áður en við förum til Kanarí. Þannig að við keyrðum hann til Keflavíkur og fórum svo aðeins í kaffi til mömmu, í kleinurnar!

Heyriði það er bara enginn tími til að baka þessa dagana, eða réttara sagt maður bara nennir því alls ekki og dagurinn í dag fer í að spá í veðrið, það nefninlega snjóaði hérna í nótt og einhver sem var búinn að segja mér að það snjóaði aldrei á suðurlandi eða allavega ekki fyrir jól og svo bara er rosalegt föl hér núna og ég verð að fara með bílinn á ný dekk svo maður dansi nú ekki hérna um göturnar, kannski þetta verði nú bara farið þegar bíllinn er kominn á dekkinn, örugglega.

jamm og jæja..... best að reyna að klára þetta verkefni í Photoshop ég er nú að reyna að klambra því saman og þarf að skila því um helgina.

Selma

Bíóhelgin mikla

2004-10-25T09:40:00.000Z

Jæja það var bara enginn tími fyrir bakstur þessa helgi því það var stanslaus gestagangur á laugardaginn og ég varð meira að segja að fara í frystikistuna og ná í köku til að hafa með kaffinu en ég nefninlega bakaði svolítið MIKIÐ fyrir afmælið hans Sigurgeirs og það lenti eitthvað af því í frystinum. Það er auðvitað alveg voðalega gott, þ.e. að eiga kökur í frystinum og betra ef maður vissi af því að einhver ætlaði að koma í heimsókn. Laugardagurinn var sem sagt gestadagurinn mikli, en það er svo skrítið með það, eins og þið vitið, að það kemur enginn í margar vikur og svo virðast allir fá sömu hugmyndina sama daginn og allir mæta. En nú var það svo heppilegt að það kom enginn á sama tíma þannig að maður hafði tíma fyrir alla. Beggi var ekki heima, var að búa til bíl í Reykjavík og kom heim einhverntímann eftir háttatíma.

Nú svo var það bíódagurinn mikli í gær. Geggjað veður þannig að við Sigurgeir fórum hérna upp fyrir með hundana og hittum þar krumma á steini, hundarnir urðu brjálaðir og vildu í krummann, en hann bara sat og sat og krunkaði á okkur og Sigurgeir vildi endilega fara og tala betur við hann en ég hélt hann myndi rjúka í okkur og vildi alls ekki skoða hann nánar. Þannig að þetta var algjört bíó fyrir hundana þó þær fengju nú ekki að elta hann. Hmm kannski greyið hafi verið vængbrotinn, en mig langaði allavega ekki að hann réðist á okkur.

Svo var brunað til Reykjavíkur með Sigurgeir í bíó, hann fór með frændsystkinum sínum í Kópavoginum á Pókimon 5 eða hvað þetta nú heitir allt saman og það var víst voðalega gaman. Ég og Bjartmar fórum ekki fyrr en hann vaknaði og aldrei þessu vant þá bara svaf hann og svaf og ég varð að vekja hann svo við misstum ekki af matnum og bíóinu. Vorum sem sagt boðin í mat hjá Sollu og Valda og Berglind passaði strákana á meðan við fórum í bíó. Mikið rosalega er nú gaman að kaupa sér popp og kók og fara í bíó þ.e. ef myndin hefði verið skemmtileg en við ákváðum með 3 atkvæðum gegn 1 að fara á myndina með Denzel Washington og Meryl Streep og gúúd hevens maður, dj.... sem hún var leiðinleg. Ég hefði nú auðvitað viljað fara á myndina með Richard Gere því hann er svo ógó sætur.
Við vorum ekki komin heim fyrr en um hálf tólf svo það verður geðvonskudagur í dag þar sem allir voru þreyttir í gær.

Og þá er nú bara að baka í dag.......

Selma

Aftur helgi

2004-10-22T14:26:00.000Z

Vá aftur er hann helgi kominn hingað, er hann svona oft hjá ykkur líka! og ég hef bara ekki skrifað í marga daga, jeminn. Nema hvað ég hafði svo mikið að gera á miðvikudaginn að fara til Reykjavíkur eða réttara sagt Álftanesið að ég fór bara 2var þangað sama daginn. Við ákváðum nefninlega að hittast 3 "gamlar" gellur, þá meina ég ekki gamlar í merkingunni aldur heldur erum við búnar að vera vinkonur með hléum alveg síðan á Húnavöllum en það er nú ekkert svo ýkja langt síðan það var eða þannig. Með hléum á ég við að við verðum ekki óvinkonur inn á milli heldur hittumst við með mislöngu/stuttu millibili. Þetta var alveg mjög svo notaleg stund og verð ég að koma þarna í björtu því húsfrúin á Álftanesinu er svo annáluð fyrir blómarækt sína að hún kemst bara í öll blöð á suðurnesjum og um daginn fékk heimilið umhverfisverðlaun bæjarins. Geri nú aðrir betur.

Nú daginn eftir var ég svo ofboðslega þreytt því það var víst komið langt fram yfir minn venjubundna háttatíma (sem er 22.00) þegar ég kom heim á miðvikudagskvöldið að ég bara meikaði ekki að hugsa um neitt, nema hjálpa Helgu með eins og eitt bókfærsluverkefni svona pínulítið og setja upp slatta af gardínum. Í gær gerði ég bara ekki neitt, nema að vera heima auðvitað og kenna einn tíma.

En merkilegt nokk hér fylltist húsið af strákum bæði í gær og fyrradag eða sko það komu 2 vinir Sigurgeirs og það er eitthvað sem ég hef ekki átt að venjast síðan ég flutti hingað. Sigurgeir er nefninlega allt í einu dottinn í gírinn með að biðja strákana að koma HEIM til sín en ekki fara eitthvað sem er bara í góðu lagi. Ætli hann sé orðinn leiður á að hanga einn heima með mömmu sinni allan daginn eða búinn að uppgötva að það er verkfall og hann hittir enga krakka allan daginn. Talandi um verkfall, nei annars hætti við, mér hættir við að blóta svolítið svo ég ætla ekki að tala um þetta h....... verkfall, að þetta skuli líðast árið 2004. Já talandi um strákana, þeir eru flottir og spurðu svo í kaffitímanum hvort ég ætti ekki snúða, fengu snúða í afmælinu hans Sigurgeirs, þeir væru svo rosalega góðir, nei þá átti ég nú ekki lengur því það var búið að borða allt sem ég hafði bakað á afmælinu hans Sigurgeirs og ég bara hef ekki nennt að baka síðan. Ég hef nú alveg haft tímann en bara fundið mér eitthvað annað að gera t.d. fara í tölvuna, hmmmm.

Svo ætli maður baki ekki bara snúða í dag.

Já og meðan ég man þá var víst jarðskjálfti hérna í gær og ég hélt að það hefði bara verið þvottavélin sem væri orðin vitlaus. Ég sat nú bara í sófanum og var að lesa blað og allt í einu heyrðust smá skruðningar eins og ef maður setur of mikið í þvottavélina og hún fer af stað eða að STÓR vörubíll keyrir framhjá og ég hugsaði hmm ég var nú búin að taka úr þvottavélinni þetta hlýtur að hafa verið jarðskjálfti og spáði svo ekki meira í það fyrr en ég spurði nemanda minn um 4 leytið hvort það hefði komið jarðskjálfti. Jájá nokkuð snarpur víst en mér fannst þetta nú ekkert voðalegt en vona nú að það komi ekki snarpari svo allur "kristallinn" minn detti ekki úr nýju hillusamstæðunni!!!

Selma

Ekki fleiri NÝ húsgögn í þetta hús!

2004-10-19T21:59:00.000Z

Nú kaupi ég bara ekki fleiri húsgögn í þetta hús, það er nokk ljóst, búin að fá nóg af gölluðu, vitlausum lit eða eitthvað. Það er nú ekki í frásögur færandi að fólk kaupi sér húsgögn auðvitað en ég verð að segja ykkur þetta. Við erum auðvitað búin að fylla húsið af húsgögnum síðan við komum hingað og viti menn alltaf gallað. Fyrst keyptum við borðstofuborð í vetur á útsölu hjá Tekk, geggjað flott borð og 6 stóla og stilltum þessu hér inn, voða flott. Einn góðan veðurdag kom hár hvellur og stærðar sprunga kom í borðið. Það var hringt og kvartað og þeir komu nú bara og tóku það aftur og við fengum nýtt borð. Í haust ákvað ég að keypt yrði hillusamstæðu í Ikea svo ég gæti raðað öllu draslinu "mínu" einhvers staðar til að þurrka af því endrum og eins. Eftir miklar vangaveltur hér heima var þetta allt klappað og klár og stormaði öll fjölskyldan í Ikea. Það var lítið til af því sem við vildum og það sem var til var gallað og þegar út í bíl var komið kom í ljós að þeir höfðu stungið lyftaragafflinum í gegnum pakkninguna. Inn með hana aftur en engin önnur til og af 4 einingum fórum við með 1 heim og biðum í heilan mánuð eftir restinni. Ég þurfti þá allavega ekki að þurrka af á meðan.
Nú svo varð auðvitað að kaupa sjónvarpsskáp undir allt tækjadótið dvdið, videóið, sjónvarpið, spólurnar og snúrurnar það er nú ekkert smá. Nema hvað fundum fínan skáp og ég spyr afgreiðslumanninn þegar hann er að setja þetta út í bíl hvort þetta sé nokkuð gallað, ég hafi slæma reynslu af slíku. Nei, nei aldrei slíkt hjá þeim en það hefur komið fyrir að við höfum afgreitt vitlausan lit. Ég grandalaus eftir fyrri reynslu og bruna með þetta heim sæl og glöð. Gleðin rennur af mér á sunnudagsmorgni þegar setja á þetta saman. Maður lifandi haldið þið ekki að þetta séu tveir litir á skápnum, keypti kirsuberja en fékk birki og kirsuberja. Okkur féllust hendur og ég var gjörsamlega mát, eina ferðina enn. En ákveðið var að setja þetta bara saman, þannig að sjónvarpsskápurinn er með birkilitaðar hliðar og framhliðin er kirsuberja. Það á örugglega enginn annar svona skáp! nema sá sem kaupir hitt settið......

Selma

Mynd af Sigurgeiri og Hlökk

2004-10-18T23:10:00.000Z

Ég er sem sagt búin að eyða öllu kvöldinu með Hörpu (hún á að vera að lesa) í að koma þessari mynd inn, vona að það gangi betur með allar næstu svo hún þurfi ekki að sitja fleiri kvöld yfir þessu með mér.
Þetta er tekið núna í haust þegar við fórum norður og Sigurgeir vildi fara að kíkja á Hlökk. Fórum því út að Þingeyrum og löbbuðum til hrossa. Það var afskaplega gaman að koma þangað eins og alltaf.

hér kemur mynd af prinsinum og gömlu minni

þrír mánuðir

2004-10-16T22:25:00.000Z

Jæja vitiði hvað, ég uppgötvaði það í gær að ég eða við erum búin að vera hér í þrjá mánuði og ég segi nú bara VÁ. Ég er búin að komast að mörgu á þessum þrem mánuðum en ég nenni ekki að telja það upp hér, nema ég verð að segja ykkur að ég gerði verðkönnun í fyrsta skipti á ævinni, því þess þurfti maður ekki fyrir norðan, maður verslaði bara við Húnakaup og þá var maður ekkert að spá í það hvað hlutirinr kostuðu. En ég gerði þessa líka furðu uppgötvun um daginn þegar ég gáði að því hvað 1 lítri af mjólk kostaði hérna á suðurlandinu og jú það munar heilum 16 krónum á dýrasta og ódýrasta. Hann er dýrastur á Selfossi í búðinni við hliðina á mjólkurstöðinni þar sem hann er settur í fernuna. Hann kostar heilar 89 kr. í Nóatúni á Selfossi, BARA 73 í Bónus auðvitað - ég fer alltaf þangað til að styðja þá kalla greyin og 79 í Hverakaup, finnst ykkur þetta ekki hallærislegt.

Annars er nú lítið títt, það var ekki rigning í gær og í morgun var alveg geggjað haustveður og ég fór að kenna og vá við vorum vissar um að það yrði alveg frábært veður í dag en nei það rigndi. Ég fór til R. og sukkaði peningum út og suður. Maður þarf nú ekki annað en að stíga út úr bílnum þá fjúka peningar í allar áttir þ.e. þessir á kortinu, ekki eins og maður gangi með seðla á sér lengur. Vantaði nokkurn slatta af gardínum og hillum af ýmsum gerðum og ýmislegt annað auðvitað. Ætla að setja upp hillu hérna fyrir framan tölvuna og setja þar mynd af okkur saumó því við erum svo gekkt flottar á henni. Ég er alveg búin að láta prenta hana út, stækkaða auðvitað. Nú þetta gekk allt vel - kom heim með fullan bíl af drasli og tóm kort en passaði mig auðvitað á að koma ekki heim fyrr en um kvöldmat og þá var maturinn bara tilbúinn á borðinu, þeir klikka ekki karlarnir á heimilinu!

Ég sá að sumarfríin eru búin og fólk er greinilega hætt að fara út á land um helgar í sumarbústaðina eða með fellihýsin, húsbílana eða hvað þetta heitir nú allt saman því það var sama hvar ég kom alls staðar var gjörsamlega sneisafullt af fólki. Maður getur orðið alveg ær yfir þessu, maður olnbogar sig áfram bæði á bílastæðunum og í búðunum, skildu allir hafa verið í sömu erindagjörðum og ég?? Ég sé það í hendi mér að ég á auðvitað að fara á mánudegi þegar allir eru í vinnunni en þá þarf ég að drösla strákunum með mér og það er eitt af því sem mér finnst alveg ömurlegt að bjóða þeim uppá þannig að ég reyni sem mest að sleppa við það. Það gerist nú samt stundum.

En meir síðar.
Selma

Ekki rigning

2004-10-14T10:41:00.000Z

Ótrúlegt en satt en það er ekki rigning hérna núna, kannski rignir ekki alla daga hérna á haustin.

Jæja ég bloggaði nú ekki gær þar sem vannst bara alls enginn tími til þess. Ákváðum að skreppa til höfuðborgarinnar í gær eftir hádegi og af því það er svo gott að koma á Álftanesið þá fórum við þangað til Jóhönnu mágkonu minnar, sorry Ella við komum greinilega ekki til þín, en næst! Maður fær líka pottþétt köku með kaffinu þar því Jóhanna er snillingur að baka og mér finnst alveg voðalega gott að komast í kökur stundum, ekki nenni ég að baka þær og ef svo er þá fara þær í frystikistuna og eru þar bara þangað til ég hendi þeim. Ekki það að ég hafi bara heimsótt hana til að fá köku, langaði bara að fara til hennar.
Nú heim þurfti ég að vera komin kl 17 því þá þurfti ég að kenna og hann Ragnar kom að passa. Ég nefninlega auglýsti eftir barnapíum í haust einhvern tíman og var lengi að velta fyrir mér hvort ég ætti að auglýsa eftir strák eða stelpu en það fór svo að ég skrifaði: óska eftir stelpu til að passa svona endrum og eins. Nema hvað sá fyrsti sem hringdi var Ragnar og næsti var Eva Dögg þannig að ég réði þau bara bæði og það er bara fínt.

Nú svo fór ég aftur kenna kl. 9 í gærkvöldi, lenti í kaffi hjá foreldrum drengsins og var bara ekki komin heim fyrr en seint og síðir, virkilega gaman. Svo MIKIÐ að gera hjá mér.

Svo er nú það, verð að tala við Hörpu um að setja inn myndir, hún var auðvitað búin að sýna mér þetta og ég búin að gleyma og hef EKKI gaman að fikta mig áfram og miklu fljótlegra er að tala við hana þá geri ég það bara og vonandi kemur mynd af MÉR fljótlega og alls engum örðum fjölskyldumeðlimum.

Selma

Bloggið virkar

2004-10-12T22:08:00.000Z

Ég verð að segja það að þetta svínvirkar, nú þarf ég aldrei að hringja í neinn, fara neitt eða senda mail til að segja fréttir af mér og mínum því þetta lesa bara allir, held ég eða þannig.
Já já Harpa mín þetta er miklu flottara og svo er allt hitt bara eftir, nógur tími, alveg að koma jól og jólapróf og svoleiðis það er svo gaman.

Nema hvað það gerðist nú ekkert í dag nema að Sigurgeir fór að heiman, vá maður, segi ég nú bara því það hefur ekki gerst síðan hann heimsótti Benna í bústað og þá ætlaði hann að gista eina nótt en var alveg fjórar, á þriðja degi kom hann og náði í tannburstann því það var ekki hægt að vera tannburstalaus í marga daga. Hann, sem sagt, fór til vinar síns og var alveg heila 4 tíma. Ég var svo andlaus á meðan að ég skúraði bara allt draslið. Miðið er það nú leiðinlegt jobb og ótrúlegt að það sé ekki búið að finna upp eitthvað sem gerir þetta fyrir mann, það er kannski búið en ég hef bara ekki séð það. Hér með auglýst eftir þeim sem vita um slík tæki.

Já sem sagt rigning og aftur rigning hér, ég held ég sé búin að fá meiri rigningu síðan ég flutti hingað heldur en allan tímann sem ég átti heima í Hún. Svo maður fer auðvitað ekki út fyrir hússins dyr, slepptum klettaklifrinu í dag, fór að kenna aldrei þessu vant og já Sigurgeir var ekki heima.

Selma

2004-10-12T21:06:00.000Z

Haloscan commenting and trackback have been added to this blog.

Koma sér í gang

2004-10-11T22:25:00.000Z

Jæja hvernig væri að koma sér í gang, ég reyndar var nú svo v...... að ég hélt að þetta væri bara ásamt hinu í vinnslu hjá henni Hörpu en þegar ég fór til hennar um daginn (úps það var örugglega í ágúst eða kannski í september) spurði hún mig að því hvort ég væri ekki að nota þetta á fullu, ha hvað sagði ég er þetta ekki bara þarna. Jú jú auðvitað á netinu. Get svo svarið það að ég var ekkert að spá að þetta væri komið á netið þannig að ég verð að haska mér af stað og segja ykkur allar fréttirnar sem héðan koma daglega eða þannig.

Annars er auðvitað ekkert að frétta hérna - Beggi fór AFTUR til Tæ, ? hvort eitthvað meira spennandi sé þar en hér, ég bara veit ekki en hann kemur allavega alltaf aftur.... Í fyrstu ferð kom hann með heimabíókerfi, dröslaði því með sér alla leið en ekki er nú búið að setja það upp því það á eftir að smíða skápinn fyrir allt sjónvarps-vídeó-bíó draslið og ég er auðvitað guðslifandi fegin því það ærir mig þá ekki á meðan. Í næstu ferð kom hann með nýjan síma handa mér því Bjartmar ofnotaði minn gamla þegar ég fór að heimsækja Guðrúnu og Gústa í sumarbústað sl. ágúst og hefur ekki borðið þess bætur síðan þ.e. síminn, Guðrún og Gústi sluppu held ég. Nema hvað síminn er auðvitað með tælenskum stöfum og þess vegna get ég ekki sent nein sms lengur því ég veit ekki hvað er hvað. Nei joke það eru líka OKKAR stafir á honum en mjög flottur sími.

Nú svo er auðvitað kennaraverkfall og allir að verða galnir auðvitað og erum við þar engin undantekning, maður nennir nú ekki endalaust að fara í sund, við Sigurgeir og hundarnir auðvitað, erum reyndar tekin uppá því núna að klífa Hamarinn bæði utan frá og innan og þá á ég við að við förum hér upp á Kambinn sem er steinsnar frá Kambahrauninu auðvitað og klífum upp hann eftir göngustígnum og förum svo yfir, niður hinu megin og fyrir endann og aftur heim. Þetta tekur nú bara alveg heilan klukkutíma. Í dag fórum við öfugan hring þannig að við klifum niður hann, þ.e. hérna megin. Slagveður allan tímann, voðalega notalegt.
Nú Bjartmar er orðinn "stærri" en þegar þið sáuð hann síðast og farinn að hlaupa, hann á það til að reiðast, ekki veit ég hvaðan hann hefur það en þá leggst hann niður og lemur hausnum í gólfið eða bara jafnvel í næsta vegg og fer svo að hágrenja. Þetta hlýtur að ganga yfir og versna, maður veit ekki.
Af mér sjálfri er svo sem ekkert nýtt ég er BARA HEIMA. Er reyndar farin að kenna í "Hveragerði", maður þekkir svo gott fólk á Blönduósi og víðar.
Segi þetta gott í bili en verð náttúrulega að vera duglegri við þetta svo Harpa á Haukagili verði ánægðari með mig, ég er allavega búin með verkefnið í Photoshop sem ég er í í fjarnámi frá IR, þurfti ekki að skila því fyrr en um næstu helgi þannig að nú hef ég tíma í þetta.
kveðja
Selma

Prufa að setja inn mynd

2004-08-17T10:54:00.000Z

Nú ætlum við að prufa að setja inn mynd.

Þetta er sem sé hún Hlökk mín :-)

Á námskeiði

2004-08-17T10:46:00.000Z

Nú er ég á námskeiði hjá Hörpu að læra á bloggið.

Prufa

2004-06-07T00:57:00.000Z

Þetta er prufa. Nú tekur Selma við...